Inuit 1000-ilikkaat Grønlandsbankiliakaarrapput

Meeqqanut ileqqaakkat ippassarli tunniussuunneqalermata pinnguaarniarfimmi Atsa's Legelandimi ulaputtoqarpoq. Atsa's Legelandimi pisiniartitsisoq Irene Rosing taama oqarpoq, pinngussallu suut nuannarineqarnerpaanersut pillugit ima oqarpoq:

- Ippassarli ammaratta maluginiarparput Nintendo DS-it spil-itaalu ingerlanerpaajusut. Niviarsiaqqanut naleqqunnerusunik peqaraluarpugut, niviarsiaqqalli Nintendo DS-imik aamma nuannarisaqarnerusut maluginiarparput, Irene Rosing oqarpoq.

Meeqqat piumasatik amerlanerusutigut pisaraat aamma maluginiarsimavaat.

Meeqqanut ileqqaakkat 2007-imi naalakkersuisunit eqqunneqarmatali aningaasat ukiumut 18 millionit koruunit ileqqaakkanut immikkoortinneqartarput, Naalakkersuisulli nutaat ileqqaakkat atorunnaarsimmassuk, ileqqaakkat ippassamiit tunniussuunneqalerput, kontogisamulluunniit ikineqarlutik.

Tamanna pissutaalluni Grønlandsbankimi ulapputtoqarpoq, kiffartuussinermut siunnersorti Peter Petersen oqarpoq:

- Inuit 1000-it missaat maani Nuummi ippassaq ornigupput, ullunut allanut naleqqiullugu marloriaammik amerlanerullutik. Ulapeqigattalu immikkut ittumik sulisoqarpugut, ullumikkullu aamma ulapeqaluta, Peter Petersen Grønlandsbankimeersoq oqarpoq.

Sinerissami bankinut orniguttut aamma 1000-it missaannniissimanissaat taassuma ilimagaa.

Kontot 18.000-it missaat ileqqaakkanut atorneqarput, katillugillu 48 millionit koruuniullutik.

Sinerissami Tele-Postcenterit aamma ulapaarfiusimapput. Illoqarfiit qulingiluat Grønlandsbankip allaffeqarfiginngilai, inuillu Tele-Postcenterit aqqutigalugit taakkunani kiffartuunneqarput.