Inuit 100-uugaangata 12-t sukkortarput
Nunatsinni inuit 100-juugaangata aqqaneq marluk sukkornermik nappaateqartarput.
Sukkortuunermik nappaateqartarneq annikillisarniarlugu Nuummi Dronning Ingridip napparsimavissuani suliniutissat 10 millioner koruuninik aningaasaliiffigineqarput, taakkulu ukiut pingasut ingerlanerini suliniutinut assigiinngitsunut atorneqassapput.
Sukkortuunermik nappaatillit pillugit suliniutit aallartisarluarneqalereersut, Nuummi nakorsat qullersaat, Kent Kleinschmidt oqarpoq.
- Taanna sukkortut ambulatoriamik taallugu qaammatini kingullerni aallartinneqarpoq. Fyn-imi qarasaasiaq aqqutigalugu atassuteqalerpuguttaaq, Kent Kleinschmidt oqarpoq.
Taanna nassuiaavoq taamaaliornikkut sukkortut nalunaarsorneqarnerat aggeqqinnissaasalu allassimanerat ingerlalluarsinnaaneruniassammat taama pilersitsisoqarsimasoq.
- Maanngaanniit aningaasaliisartunik qinnuteqarnikkut tamanna iluatsinneqarsinnaasimavoq, oqarpoq.
Nangilluni nassuiaavoq sukkorneq pinaveersimatinneqassappat pinngitsooratik iliuuseqartariaqarsimallutik.
- sukkorneq pinaveersimatinneqassappat inuit paasisassaanniit suli annertunerujussuarmik paasititsiniutigisariaqarparput inooriaaseq nutaaq paasititsiniutigineqartariaqarpoq. Inuit timertik aalatinnagu inuujuarunik soorlu pualavallaanngikkaluarlutik biiliinnarnik ingerlateqartuarunik nerisaallu orsoqarpallaartuarunik sukkulertoqarsinnaavoq, tassa imaappoq aalanngippallaarneq tunngavigalugu oqarpoq.
Erseqqissaavoq nerisat peqqinnartut suut, tungusunnitsullu pinaveersaarnissaat paasineqartariaqalersoq.
Nassuiaavoq sukkorneq qasoqqajaanerulernikkut malugineqaqqaarajuttartoq, kiisalu eqqumiitsunik mamippiarusunngitsunillu ikeqartarneq malussalernernut ilaasartoq taamalu aamma siornatigut ajuartarnikuunani ajuartalernerit malunniutaasartut taamatuttaaq imerusuttuarnerit pilernerisigut malugineqarsinnaasartoq.
- Ilai puallartarput ilai sanigortarput, eqqumiitsumik timimi pisoqaleraangat taava sukkorneq eqqarsaatigilertarparput, Kent Kleinschmidt oqarpoq.
Sukkortuunermik nappaateqartut aamma atuarfissaannik pilersitsisoqassaaq, tassani sukkortuunermik nappaateqartut nappaat pillugu qanorlu inuunerinnerulersinnaaneq anguniarlugu ilinniartinneqartassapput.
