Inuinnaat kilitsissiatut sulisinnaanerat alapernaanneqartariaqarpoq
Hans Jørgen Bonnichsen oqarpoq siusinnerusukkut nakkutigineqarnerpaat tassaasimagaluartut politikimut tunngatillugu eqqarsartaatsimikkut ingasattajaarniarnerpaat, ingaminngooq 2001-imi septemberip aqqarngata kingorna. Politiit isertortumik paasiniaasartuisa piffissami matumani alaatsinaannerpaasaat tassaapput islamimik upperisarsiortut. Taakkununngali tulliutillugit puigorneqartariaqanngilaq Danmarkip nunataani suli kilitsissiaqarmat, kilitsissiallu tamakku Danmarkimi inuiaqatigiit inuunerannut akorngutaalersussamik suliaqarsinnaanerisa alaatsinaannissaat – pinngitsoortinniarnissaallu – politiit isertortumik paasiniaasartuisa suliassaasa pingaartut ilagaat, politiit isertortumik paasiniaasartuini – PET-mi – siusinnerusukkut pisortaasimasoq, Hans Jørgen Bonnichsen oqarpoq. Isertortumik paasiniaasartoqarneq pillugu inatsisit 1968-imi aalajagnersarneqartut taamanikkulli allannguuteqarsimanngillat. Tamannalu tunngavigalugu inuit ataasiakkaat qanoq upperisaqarnerat, politikikkullu qanoq paasinnittaaseqarnerat, kisiisa tunngavigalugit isertortumik alaatsinaanneqartarnissaat inerteqqutaavoq.
Taamaammat PET-p isertortumik paasiniaanermi periaaserisartagai pillugit oqallittoqaqqilersinnaasoq Hans Jørgen Bonnichsen isumaqarpoq, tassami massakkut alaatsinaanneqartartut tassaakkajuttarmata islamimik upperisaqartut. - Politiit isertortumik paasiniaasartuisa suleriaasiat pillugu ukiut qulikkaarlugit alaatsinaanniartoqalersarnera ileqquliutiinnarneqarsimasutut isigineqarsinnaasoraara, taamaattumik taamatut pisoqarsinnaanera ilimagineqarsinnaasoraara, taamaattumik assingusumik pisoqaqqinnissaa pinngitsoortinniarlugu PET-p suleriaasiata nakkutigineqarnissaa qulakkeersimaniarlugu periaasissat nutarterneqarnissaat pingaaruteqarpoq, Hans Jørgen Bonnichsen Danmark Radiomit apersorneqarluni oqarpoq.
