Inuiattut ullorsiortarneq nunatsinnut aamma sunniuteqartarpoq
Savalimmiormiut tuusintilikkaarlutik, ilarpassui inuiattut assuutiminnik atisisimallutik, illoqarfinniit nunaqarfinniillu Thorshavniliakaasarput, aqqusernit pingaarnersaanni malugeqqusaariartorlutik, ikinngutitik ilisarisimasatillu ilassiniarlugit aaqqissuussinernullu assigiinngitsorpassuarnut peqataajartorlutik.
Nalliuttorsiualaarnerit Savalimmiuni inunngortartunut takussutissaqartut ippassaq oqaluttuaraarput. – Sapaatip akunneri 40-t qaangiukkaangata, tassa inuiattut ullorsiornermit qaammatit qulingiluat qaangiukkaangata ukiup sinneranut sanilliullugu amerlanerusunik inunngortoqartarpoq.
Dronning Ingridip napparsimmavissuani juumuumut paasiniarparput, kalaallit inuiattut ullorsiortarnerat, juunip 21-at inunngortartunut sunniuteqarnersoq.
Paasivarput sunniuteqartartoq! SANA-mi juumuup Kirsten Aunstrupip uppernarsarpaa inuiattut ullorsioraangatta oqalugiartunut tusarnaaginnaratalu asimut igaasariaannartanngitsugut.
Nalinginnaasumik nunatsinni qaammammut inunngortartut 25-t missiliortarpaat, ukiunilu kingullerni pingasuni marsip naalernerani – tassa juunip 21-ata kingornagut qaammatit qulingiluat qaangiunneranni - inunngortartut 30-t sinneqalaartut!