Inuiattut ullorsiorneq: Puisinniarneq, kaagiliullaqqinneqqusaanneq erinarsoqatigiinnerlu

Nunatsinni inuiattut ullorsiorneq ukioq manna nalinginnaasumit allaanerussaaq. Covid-19-ip kingunerisaanik killilersuinerit pissutigalugit ukioq manna pisussasunut kommunit qassiiusuni isumassarsiortariaqarsimapput.

Avannaata Kommunia

Avannaata Kommuniani inuiattut ullorsiorneq facebookikkut malinnaavigineqarsinnaavoq.

- Kommuni nalunaaqutaq qulingiluanut erfalasumik amusilluni aallartissaaq. Tamatuma kingorna kommunip allaffiini ullaakkorsioqatigiittoqassalluni.

- Zionip oqaluffiani nalunaaqutaq qulingiluanut naalagiaqatigiinneq, Naalagiaqatigeereernerup kingorna imaani ajunaarsimasut eqqaaniarlugit krasertaliisoqassaaq.

- Tamatuma kingorna nalunaaqutaq qulinut oqaluffiup eqqaanit puiseqqaanniuunneq aallartinneqassaaq. Nalunaaqutaq marlunit sisamanut puisillertoqassaaq.

- N-48-mi I-69-imilu utoqqasaat isikkammik nalunaaqutaq tallimanut arsaatissapput.

Unnuup sinnera nalunaaqutaq unnukkut arfineq-pingasunit Sermermiut Kulturikkut illuarsuani kalattoortitsisoqassaaq.

Kommuneqarfik Sermersooq

Kommuneqarfik Sermersuumi aaqqissuussinerit amerlanerpaartaat qarasaasiatigut ingerlanneqassapput. Tassa imaappoq aaqqissuussinernut takkulluni peqataasoqarsinnaanngilaq, internettili atorlugu malinnaasoqarsinnaassalluni.

Kommunip pisussat immikkoortunut marlunnut avippai. Ullaakkut pisussaqarlunilu kingorna ualikkut pisussaqarpoq.

- Nalunaaqutaq arfineq-pingasunut puiseqqaanniuutsitsisoqassaaq, erfalasoq amuneqassaaq Kommuneqarfik Sermersuullu borgmesteri, Charlotte Ludvigsen oqalugiassalluni.

- Nalunaaqutaq ataatsip tungaanut assigiinngitsunik nipilersortoqassaaq. Matumani erinarsoqatigiit NIPE aamma Qupannavaat erinarsussapput, Nuuk byorkesteri appisimaassaaq tivasoqassallunilu. Tamatuma saniatigut kommunip facebookimi quppernermini Kalaallit Kaagiat, Kittat kalaallisuullu pillugit aamma aallakaatitsisoqassalluni.

- Ualikkut pisussat nalunaaqutaq ataatsimut aallartippata kommuni puiseqqaanniuutsitsinermit utoqqaat illuini puisillissaaq. Tamatumalu sanitigut Ktsi Kleist Miké Thomsenilu nipilersussallutik. 

- Nalunaaqutaq marlunut Tasiilaq Swing band ilaatigut isiginnaarneqarsinnaassapput.

Kommune Kujalleq

Kommune Kujallermi kommunip aaqqissuussai facebookikkut Seekon radiokkullu malinnaavigineqarsinnaassapput.

- Qaqortumi kommunip silataani nalunaaqutaq arfineq-pingasunut erfalatsertoqassaaq, erinarsoqatigiillu Saqqaarsik aamma Vilhelm Lyngep Erinarsoqatigiivisa Nunarput utoqqarsuanngoravit atussavaat. Kommune Kujalliup borgmesteria, Kiista P. Isaksen kommunip allaffianit aamma oqalugiassaaq.

- Nalunaaqutaq aqqanermut kommunip Nuna asiilasooq Facebookikkut Seekon radiokkullu appisimaarpagu angerlarsimaffimmit aneerasaartarfimmiilluunniit erinarsoqataaffigineqarnissaa kaammattuutigaa.

- Nalunaaqutaq ataatsimut nunatta kujataani sumiiffinnit tamanit nipilersortartut oqaluttuartitsinerillu facebookikkut Seekon radiokkullu aallakaatinneqassapput.

Taanna nalunaaqutaq unnukkut arfineq-marlunut aallakaateqqinneqassaaq.

Qeqqata Kommunia

Qeqqata Kommuniani kommunip illoqarfiini nunaqarfiinilu assigiinngitsunik pilersaaruteqarpoq.

- Sisimiuni arfineq-pingasunit puiseqqaanniuutsitsisoqassaaq, pisartullu siulliit pingasunit kommunimit aallaasinik akissarsitinneqassapput.

- Tamatuma kingorna erfalatsertoqassaaq Nuna asiilasoorlu nalunaaqutaq 9.15 atorneqassalluni. Qeqqata Kommuniata borgmesteria, Malik Berthelsen oqalugiassaaq kingornalu oqaluffimmut ingerlaaqatigiittoqariarluni qulinut naalagiaqatigiittoqassalluni.

- Nalunaaqutaq ullup-qeqqanit marluk tungaanut qajartartut peqatigiiffiat, Qajaq Sisimiut qajarnermik takutitsissaaq.

- Kulturikkut illorsuup silataanit nalunaaqutaq marlunit tallimanut nipilersortoqarlunilu aliikkusersuisoqassaaq.

Maniitsumi kommunip allaffiata silataani nalunaaqutaq 8.30 erfalasoq amuneqassaaq inuattullu erinarsuut atorneqassalluni. Kommunalbestyrelsemi ilaasortaq Ruth Heilmann ullorsiornermi oqaluartuussaaq.

- Nalunaaqutaq qulinut puiseqqaanniuutsitsisoqassaaq.

- Nalunaaqutaq ullup-qeqqanit illoqarfiup qeqqani kaffillertoqassaaq, kaagiliorumatuunullu ilaatigut kaagiullaqqinneqqusaatsitsisoqassalluni.

- Nalunaaqutaq marlunit Annersuarmi meeqqat utoqqaallu isikkammik arsaatissapput. Meeqqanullu inuusuttunut klubbianni nalunaaqutaq 18-imit 20.30-p tungaantu qititsisoqassalluni. Unnukkut kingusinnerusumi inersimasut qittakkumaarput.

Kommune Qeqertalik

Kommune Qeqertalimmi inuiattut ullorsiornissamut illoqarfinni nunaqarfinnilu immikkut assigiinngitsunik pilersaaruteqarpoq.

Aasianni erlasoq arfineq-pingasunut amuneqassaaq Nuna asiilasoorlu ataatsimut atorneqassalluni, tamatuma kingorna borgmesteri, Ane Hansen oqarlugiassaaq.

Aamma katersugaasiviup silataanit qamutilittartoqassaq.

- Nalunaaqutaq qulingiluanut Niels Egedep Oqaluffiani naalagiartoqassaaq, kommunilu katersortarfimmi Qagssemi ullaakkorsiortitsissalluni.

- Nalunaaqutaq aqqanermut marluk ataatsikkut ingerlanneqassapput. Qatserisarfiup silataani meeqqat aggerlutik qapummik sammisaqariartorsinnaapput. Inersimasunullu puiseqqaanniuutsitsisoqassalluni.

- Aamma nalunaaqutaq marlunut kulturikkut nersornaasiisoqassaaq.