Inuiattut ullorsiornermi pisussarpassuit

Ullortunersiornissamut kommunit illoqarfinni ataasiakkaani pisussanut pilersaarusioreerput, Qaqortumi kulturi pillugu sapaatip akunneqartitsineq aqagu marlunngornermi aallarneqassaaq. Pilersaarutaat takuneqarsinnaapput.

Allattoq Ludvig Siegstad

juunip 18-at 2012 13:45

Rasmus Lyberth, Pele Møller aamma Lone Josefsen kalaalerlu operamik erinarsortartoq Josef Josefsen, tassaapput nunatsinni erinarsortartut tusaamasat Qaqortumi kulturi pillugu sapaatip akunneqartitsinissamik, puilasup eqqaani, ualikkut ammaasussat ilaat.

Kommunini pingasuni innuttaasut inuiattut ullorsiornermi, sisamanngorpat juunip 21-ni, sulerissanerlutik kommunit nittartagaanni atuarsinnaavaat, Kommuneqarfik Sermersooq minilluni, tassani pisussat kommunip nittartagaanut suli ikkunneqarsimanngimmata.

Illoqarfiit ilaanni kulturimut tunngasumik illoqarfimminni suliniuteqarluarsimasoq suliuneqarlusimasulluunniit nersornaaseqassapput.

Maniitsumi timersuutit pingasut tulleriiginnarlugit timersorfiusussat ingerlanneqassapput. Timersortut arpassallutik, qajartussallutik naggataatigullu illoqarfimmi 50 kilomeritutut isorartutigisumik sikkilissallutik.

Illoqarfiit ilaanni ukiuni kingullerni ileqquulerpoq puisimik tikiusseqaarniuttoqartarluni. Imaaginnarpoq umiatsiaaqqat avataani puisimik pisaqaqqaarniuteriarlutik nunamut tulaasseqqaassasut. Qasigiannguani Sisimiunilu puisimik tikiusseqqaarniuuttoqassaaaq.

Sumiiffiit amerlanersaanni inuiattut ullorsiorneq kommunip allaffiisa eqqaanni ullaakkut nalunaaqutaq 08.00 aallarneqartarpoq, inuiattut erinarsuut erinarsorneqarluni.

Qaqortumi kulturi pillugu sapaatip akunneqartitsineq sapaatiuppat naammasissaaq.

Aajuku kommunit inuiattut ullorsiornermi pisussatut pilersaarutaat:

http://www.kujalleq.gl/index.php?option=com_content&view=article&id=612%...

http://www.kujalleq.gl/index.php?option=com_content&view=article&id=614%...

http://www.kujalleq.gl/images/_pdf/kultur_fritidsforvaltningen/oversigt/...

http://www.qeqqata.gl/LinkClick.aspx?fileticket=mzbo4H6d7%2bE%3d&tabid=57

http://www.qeqqata.gl/LinkClick.aspx?fileticket=eXEfaQLqzec%3d&tabid=57

http://www.qeqqata.gl/LinkClick.aspx?fileticket=R7e9n5cGnCU%3d&tabid=57

http://www.qaasuitsup.gl/da-DK/Om-kommunen/Kalender/~/media/Files/Om-kom...