Inuiaqatigiinnut akuliunniarnikkut ajornartorsiortut ikiorneqarlualissapput
Peqatigiiffik Kalaallit Meerartaat Danmarkimi tallimanik immikkoortortaarpoq, meeqqanik inuusuttunillu inuiaqatigiinnut akuliunniarnermikkut ajornartorsiutilinnik ikiuisussanik. Esbjergimi ingerlatsisunngortup Naja Sørensenip pingaartippaa meeqqap pisariaqartitasa siullermik tusaaniarneqarnissaat. Inersimasut inuiaqatiginnut akuliunnissaat ukiuni arlaqalersuni sulissutigineqarsimavoq kingullertigut meeqqalli pisariaqartitsisut danskit oqartussaannit aamma maluginiarneqalersimavoq.
- Meeqqat arfineq-marlunniit 18-inut ukiulllit sullinneqarnissaat, inuiaqatigiinnut akulerulluarnerulernissaat qujanartumik anguniarneqalersimavoq.
Meeqqap sorusunnera taavalu soqutigisai aallaavigalugit paasiniassavarput, suut aqqutigalugit assigiinngitsunik sammisaqartitsiniassalluta. Imaassinnaavoq meeraq timersornikkut soqutigisaqaraluarluni ingerlariaqqinnissani nalugaa, taava uagut tassani aqqutigineqassaagut. Assigiingitsunik sammisassaqartitsivinnut uagut paasiniaallutalu oqaloqatiginnissaagut, meerarlu ingerlariaqqinnissaanik kaammattussavarput,
Naja Sørensen, Peqatigiiffik Kalaallit Meerartaasa Esbjergimi immikkoortortaani ulluinnarni ingerlatsisunngortoq, oqarpoq.
Isumaginninnermut ministeriap ukiunut tulliuttunut sisamanut atugassat 19,9 millioni koruunet Peqatigiiffik Kalaallit Meerartaanut tapiissutigai.
