Inuiaqatigiilerinermut ilinniutit amigaataapput

Meerartagut Atuarfitsialammi atuartut, inuiaqatigiilerinermut imaluunniit inuiattut oqaluttuarisaanitsinnut tunngasunik sammisaqaraangamik aalajangersimasunik ilinniutissaqanngillat, iliunniutissanik aalajangersimasunik suli sanasoqarnikuunngimmat, aammali ilinniusiorsinnaasut amigaatigineqarmata Taama oqarpoq Inerisaaviup ataani ilinniusiorfimmi pisortaagallartoq Abia Abelsen.

- Tassungaqqinnaaq tunngasunik ilinniusisanik ullumikkut amigaateqartorujusuuvugut. Suliassanik siornali pingaarnersiuinitsinni suliassanut pingaarnerpaanut ilanngunnikuuarput- tassa atuakkat inuiaqatigiilerinermut tunngasut sanaartussallugit.

Abia Abelsen oqarpoq inunnik ilinniusiorusussinnaasunik nunatsinni assut amigaateqartugut.

- Massakkullu ilungersorluta ujaasivugut.

Aperaarput ilinniusiortut qanoq ittut atorfissaqartinneqarnersut akivorlu:

- Inuit Nunatsinnik ilisimaarinnilluinnaqqissaartut meeqqanik inuusuttuaqqanik inerismasunillu aamma ilisimaarinnittut, Nunatsinnilu ingerlaatsitsinnik ilisimaarinnittut.

Ilinniusiortussat meeqqat ilikkarniarnerannut iluaqutaasinnaasunik atorsinnaasunillu sanasinnaasariaqarnissaat aamma pingaaruteqarnerarpaa.

- Manna tikillugu inuiaqatigiiinnut tunngassuteqartut mikisunnguakkuutaarlugit faginut/atuartitsissutinut allanut atortussiornermi ilanngussuunneqartaraluarmata, tamannali kisianni soorunami naammanngilaq. Atortussianik nutaanerusunik immikkuullarissunillu amigaateqarpugut.

Iliniusiornermi aningaasat-aasiit aalajnagiisuulluinnartussaassasut Abia Abelsen oqarpoq.

- Aningaasarpassuusariaqassapput –atuakkiorneq akisoorujusuugami. Apeqqutaavorlu atuakkat qanoq isikkoqarnissaat; qanoq issutigissappat, qanoq angitigissappat, qassiussappat? Atuakkiortut titartaasullu aamma akilissaapput, tassa tamakkua tamarmik apeqqutaaqataasarput. Sukumiisumillu pitsaasumik suliarineqassappata, minnerpaamik ukiut marluk atorneqartussaapput.

Inatsisartut aqagu ataatsimiinneranni oqaluuserineqassaaaq, Inuit ataqatigiinneersup Juliane Henningsenip ilinniusiornermut tunngasumik siunnersuutaa. Inuiattut pingaartitta oqaluttuarissanikkut inuiaqatigiilerinikkut il.il. aaqqissuussaasumik katersuisoqarnissaannik katersallu ilinniusiarineqarnissaannik Juliane Henningsen siunnersuuteqarpoq.