Inuaqqat GPS-inik atortulersorneqarput

Congoliap orpippassuani inuaqqat sumiissusersiutinik satellitimut atassusilinnik- GPS-inik – danskit suliffissuaqarfianit atortulersorneqarput.

Danskit suliffeqarfiutaat orpippassuarni FSC-imik taaneqartartuni orpinnik piiaanissaminut akuerineqarsimavoq. Orpippassuit FSC-imik taaneqartartut tassaapput orpinnik nungusaataanngitsumik piiaavigineqarneqarsinnaasut. Nungusaataanngitsumik orpinnik piiaasarnerup kingunerisaanik danskit suliffeqarfiutaat orperujussuarnik marlunnik ukiut 30-t qaangiukkaangata aatsaat peersisinnaatitaavoq. Akuersissummik taama tunisinniaraanni piumasaqaatit aappaat aamma naammasseqqaartariaqarpoq; tassalu orpippassuit inuiisa orpippassuarni inooriaatsiminnik attassiinnarnissaannik akuersinissaq. Tassa imaappoq, orpippassuit inuiisa kulturiat upperisaallu illersorniarlugit suliffeqarfissuaq suliniuteqartariaqassaaq. Tamanna imaannaanngitsuussasoq takorloorneqarsinnaavoq; orpippassuarnimi angalaannartut piniartullu ullut 14-iniunngitsulluunniit uninngalaariarlutik allamut aallaqqittarnerat pissutaalluni. DLH-mi avatangiisit pillugit oqaaseqartartoq, Erik Albrechsen, tamanna pillugu ima oqarpoq:

- Tamanna oqitsuinnaassanngilaq, taamaattorli nutaaliat tamatsinnut iluaqutaasussanngorlugit atorniarpavut. GPS-t tigummiarneqarsinnaasut orpippassuarmiunut tunniunniarpavut, taakku angalanerminni orpiit imminnut pingaarutillit nalunaaqutsersorniarpaat. Nalunaaqutseeriaraangata allaffeqarfitsinni takuneqarsinnaalissapput. Taamaalillutillu orpinnik piiaasartutta erngerlutik takusinnaalissavaat orpiit ilaat, eriagisassaanini pillugu peeqqusaanngitsoq, avaqqullugu allat piaassallugit, Erik Albrechsen oqarpoq.

Taanna DR-imit aperineqarpoq orpippassuarmiut taama aaqqiineq iluarineraat, ima akivoq:

- Aap, tamatsinnut iluaqutaasoq takusinnaagamikku taama atortulerneqarnertik takusinnaasara malillugu iluarisimaarpaat, Erik Albrechsen naggasiivoq.