Nalunaarusiaq: Internettimut attaveqarnerup pitsaanerulersinnissaa issittumi nunat sulissutigisariarpaat
Issittumi Siunnersuisooqatigiit nalunaarasuartaatitigut attaveqaqatiigiinneq pillugu nalunaarusiaanni, ministerit Alaskami Fairbanksimi ataatsimiinnerannut atatillugu siunnersuisooqatigiit saqqummersitaanni tamanna kajumissaarutigineqarpoq.
Københavnimi DTU Polarip pisortaata, Niels Andersenip, Norgellu Avataarsuanik misissuisoqarfiata pisortaata, Bo Andersenip, nalunaarusiap suliarineqarnera siuttuuffigaat.
- Inuiaqatigiinni nutaaliaasuni attaveqaqatigiinnissamut naammattunik periarfissaqarnissaa pingaaruteqarluinnartuuvoq, Niels Andersen KNR-imut taama oqarpoq.
USA-p Issittumi Siunnersuisooqatigiinni ukiuni kingullerni marlunni siulittaasuutitaqarnermini teknologi attaveqaqatigiinnerlu oqaluuserisassanngortittarpai.
Issittumi naalagaaffinni arfineq-pingasuusuni internettimut attaveqarsinnaanermut periarfissat nalunaarusiami nutaami naleqqersuunneqarput. Ataatsimullu isigalugu siuariartortoqarnera takuneqarsinnaasoq, Niels Andersen taama isumaqarpoq.
- Nunani inuttunngitsuni illoqarfiit mikinerusut nunaqarfiillu annertuumik suliniuteqarfigineqarput. Attaveqaqatigiinnikkulli naammassisaqarsinnaassuseq, båndbreddemik taaneqartartoq, annikippallaarlunilu ajortiasuuvoq.
Pingaartumillu Alaskami, Canadami, Ruslandimi Kalaallit Nunaannilu inuttunngitsuni attaveqarniarneq ajortiasuuvoq attaveqaatip ataasinnaanera pissutigalugu, soorlu immap naqqatigut kabelikkut, sakkortusaavikkut qaammataasatigulluunniit.
Nunarpulli teknologimut tunngatillugu, attaveqarnermuunngitsorli, nunat siuttuusut ilagivaat.
- Kalaallit Nunaanni attaveqaqatigiinnerup tamarmiusup ineriartortinneqarnissaa annertuumik iliuuseqarfigineqarpoq - sulilu ingerlanneqarluni. Teknologi nutaajunerpaaq pigineqarpoq, atulersinniarnerali atornissaalu aamma qajannartuupput. Imaata naqqatigut kabeli ilulissamit aqqutalugineqarpat attaveeruttoqassaaq.
Nunallu Sverigetut, Norgetut Islanditullu ittut, innuttaasut internettimut attaveqarsinnaanerannut tunngatillugu siuttuupput.
Internettimut attaveqarniarnerup ajornartorsiuteqarfigineranut aaqqiissutissanik nalunaarusiami kaammattuuteqanngilaq. Immikkulli suleqatigiissitat Issittumi Siunnersuisooqatigiit ataanniittut tamanna misissuiffigisussanngorpaat.
Issittumili Siunnersuisooqatigiit Issittumi nalunaarasuartaatitigut attaveqaqatigiinnerup pitsaanerulersinneqarnissaanik kaammattuuteqarnera pingaartuuvoq. Nunanut Issittumiittuinnaanngitsunut, aammali nunarsuup sinneranut, Niels Andersen taama isumaqarpoq.
- Sumiiffiit assigiinngitsut pitsaanerusumik pilersorneqaliinnaratik nunat issittumiittut tamarmik nunarsuarmi aningaasaqarnermut tamarmiusumut naleqquttumik akuulersinnissaat anguneqarsinnaavoq. Tamannalu anguniagassatut pingaartutut isigaara.
