Internettertartut pasineqaraluartut
Nittartakkat qarasaasiami nuisinniarneqartut toqqaraluarlugit qallunaat naalagaaffiata politiivisa nittartagaat nuisarpoq, meeqqanik atoqateqarnermut tunngasuusoq iserfigeqqusaanngitsoq allassimasarluni.
Taamatulli misigisaqarsimasut eqqissiinnarsinnaapput.
Meeqqanik atoqateqarnermut nittartakkanut mianersoqqussut Københavnimi naalagaaffiup politiivisa kukkuluttornerisigut nuisalersimavoq. Politiimmi meeqqanik atoqateqartartunut akersuunneranni nittartagartik nutartertuartuuaat, tassalu nittartagaq automatiskimik nutarterinermini Facebook, Google allarpassuillu nutarterinermi ilanngussuunneqartoorsimallutik.
Kukkuluttortoqarmat Danmarkimi suliffeqarfiit arlallit eqqugaapput, tassalu Tele Greelandip internettertartui eqqugaasunut akuullutik.
- Ullaaq arfineq pingasunut qiteqqunnissaata tungaanut susoqarnersoq sianiginngerluinnarparput, taamaasiniariartormi Naalagaaffiup Politiivisa attaveqarfigivaatigut kukkuluttornerlu nalunaarutigineqarluni. Jeppe Jensen Tele Greenlandip pisortaqarfiani allataasoq taama oqarpoq.
Meeqqanik atoqateqartartut nittartagaat sumiinnerinik mianersoqqussutit naalagaaffiup politiivisa unnuit tamaasa nutartertarpaat, Tele Greenlandillu qarasaasiaqarfianut ingerlaannaq nassiunneqartarlutik. Ullaarli tassa nittartakkat ajoquteqanngerluinnartut tassa ilanngusuunneqartoorsimapput quarsaartitsingaatsiarsimallutillu.
- Qujanartumik kukkuluttorneq unnuaannarmi pimmat atuisartut ikittuinnaat eqqugaapput. Kukkuluttornermik eqqugaasut nalunaarfigipallappagut ullaarlu qulingiluanut qiteqquttoq suna tamarmi iluarsineqareerluni, Jeppe Jensen taama oqarpoq, internettimillu atuisartut quarsaartinneqarsimasut ima eqqissisarpai:
- Atuisartut taama misigisaqartut eqqissiinnarsinnaapput. Meeqqanimmi atoqateqartartut nittartagaanik atuisuunnginneri qulakkeerneqareerput, tamatumalu saniatigut Naalagaaffiup Politiivisa nittartakkamik nutarterisoqaleraangat susoqarnersoq malinnaaffigilluarnerulerniaraat unnersiutigineqareerpoq, tasaa kukkuluttortoqaqqissanngilaq. Jeppe Jensen Tele Greenland sinnerlugu taama oqaaseqarpoq.
