Internetsimik akeqanngitsumik atuinissaq ataatsimiititaliap naaggaarpaa
![](/sites/default/files/styles/image_934x467/public/article_images/tastatur_630.jpg?itok=fpTpWS4g)
Ilinniartoqarfinni atuarfinnilu attaveqaqatigiinnikkut paasissutissiisarnikkullu atortorissaarutit, ilaatigut internetsikkut atuinermi sukkanerusumik kinguneqartussamik pitsanngorsarneqarnissaat pillugu Naalakkersuisut peqquneqarnissaannik IA-meersoq Kaali Olsen siunnersuuteqarpoq.
Siunnersuut partiinit tamanit tapersersorneqaraluarpoq. Tamannalumi aamma Nalakkersuisunit tapersersorneqaraluarpoq. Aningaasaqarnikkulli kinguneqaatissai oqaaseqarfiginiarlugit puigorneqarsimapput, "tamannalu ajuusaarnartorujussuusoq" ataatsimiititaliap isumaliutissiissutaani ersersinneqarpoq.
Siunnersuutip Naalakkersuisunit isornartumik suliarineqarsimanera ataatsimiititaliamit maluginiarneqarpoq:
- Aningaasatigut kingunissaasa isumaat minnerulinngilaq, naalakkersuisut oktobarip arfernani 2010-mi akissuteqarlutik allagaqarmata siunnersuutip aningaasatigut kingunissai naatsorsorneqarsimanngimmata siunnersuut itigartinneqartussatut inassutigalugu. Oktobarip arfineq-aappaani akissutitut allagaqaat iluarsineqarpoq, aningaasatigut kingunissaasa eqqarsaasersuutigineqarsimaneri peerneqarsimallutik, aammalu Naalakkersuisut inassutigalugu siunnersuut akuerineqassasoq.
Ataatsimiititaliamit ilimagineqarsimavoq, Nunatta Karsianut siunnersuutip aningaasatigut kingunissaannik Naalakkersuisut eqqarsaasersuuteqarsimasut. Ajoraluartumilli ilimaginninneq eqqortuunngilaq, tamannalu takuneqarsinnaalluni Naalakkersuisut Ataatsimiititaliap apeqqutaanut akissuteqataanni kiisalu Ineqarnermut Attaveqarnermut Angallannermullu Naalakkersuisumik apersuinermi. Ilinniartitaanermut Ataatsimiititaliaq isumaliutissiissummini taama allappoq.
Suliaq imaalillugu eqikkarneqarsimavoq, siunnersuut tunngaviatigut tamakkiisumik taperserneqarluni, kisiannili aningaasatigut kingunissaritinneqartut annertuut maannakkut aningaasatigut tunngavissani nassaarineqarsinnaanngitsut.
Taamaattumillu siunnersuut itigartinneqassasoq ataatsimiititaliap inassutigaa.
Ullumi marlunngornermi siunnersuut Inatsisartunit aappassaanerlugu oqaluuserineqassaaq.