Internetikkut nioqquteqarneq poortukkanik amerlisitsivoq
Tamatumanilu Tele Post-ip internetti qujamasuutigaa.
- Internet atorlugu nunat allamiut danskillu niunertarfiinut pisisarneq annertusiartorpoq, taakkualu pissutigalugit poortukkat Kalaallit Nunaannut nassiunneqartartut amerliartorput, Tele Post tusagassiuutinut nalunaarummini taamatut allappoq.
Poortukkammi Danmarkimit nassiunneqartartut ukiup ataatsip ingerlanerani 20 procentinik amerliarsimapput.
Poortukkat nunani allanit nassiussat malunnaatilimmik qaffariaateqarnerat Tele POST-ip malugaa.
Nassiussat taakku piffissami tassani aamma 52 procentit missaannik qaffariaateqarput. Danmarkimeersut nunaniillu allaneersut annertussusaat POST-ip suliarisartagaani annertunerpaapput.
- Poortukkat nassiunneqartartut amerliarsimanerat Tele Postip aningaasatigut isertitsissutigisaanut pitsaasumik kinguneqarpoq, Tele Postip pisortaa Per Svendsen oqarpoq, tamannalu pisarisaqartinneqartoq oqaatigalugu.
Poortukkat Kalaallit Nunaannut nassiunneqartartut ukiuni kingullerni arfineq pingasuni akerlariartut allakkat nassiunneqartartut ikileriarsimapput.
Allakkat Kalaallit Nunaani Danmarkimullu nassiunneqartartut ikiliartorput, tamatumalu kingunerisaanik allakkeriveqarfiup aaqqissuussaanerata nutaamik naleqqussarneqarnissaa pisariaqartoq, Tele Post tusagassiuutinut nalunaarummi taamatut allappoq.
