Inoqutigiit pissakilliorlutik inuusut

Meeqqat kaallutik innartartut nunatsinni takornartaanngillat. Meeqqat arfiniliugaangata ataaseq ilaquttani pissakittuni peroriartortartoq, Meeqqat Inuusuttullu Pillugit Ilisimasaqarfiup MIPI-p nalunaarusiaani atuarneqarsinnaavoq. Ilaqutariit Maniikkutdlakkut Kuummiuneersuupput, pissakinnerusunullu ilaallutik. Ilaannikkut naammattunik nerisassaqarneq ajorput. Meeqqat atuariartuleraangamik taquarneq ajorput, atuarfimmi nerisitsisoqartarmat.
Assi © : KNR
Allattoq Mads Lynge
maajip 15-at 2008 17:23

Atuarfimmi nerisinneqartarnerat anaanaasup Magnusine Manikutdlaap ima oqaatigaa:

- Atuarfimmi nerisartagaat annikitsuinnaasartut nalunngilara. Ullup ingerlanerani igaartorsimanngikkaangamik kaallutik innartariaqartarput, nerisassat pisiniarfimmiittut akisuallaarmata, Magunsine Manikutdlak oqarpoq.

Meeraat amerlanertigut juullikkunni inuuissioraangamillu aatsaat atisartaartarput, kommuniminngaanniillu ikiorserneqarnissaq ajornakusoorsinnaasarpoq:

- Tasiilap kommunia ikiorsiinissamut akissaqanngilarluunniigooq, kommunip akissaqannginnera saaffiginnikkaluaraangama paasitinneqartarpunga. Soorunami tujorminarpoq suliffeqarnani, ilaqutariillu napatinneqarnissaannut atugassat 5000 koruuniinnaammata, Magnusine Manikutdlak, Kuummiuneersoq oqarpoq.

Ilaqutariit Manikutdlakkut tassaapput ataataasoq Barselaj, anaanaasoq Magnusine, niviarsiaqqallu arfinillit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq