Inoqqaanik ilisimatusarfimmi aqutsisussanngorpoq
Nujamerngit ukiunik 4.500-nik pisoqaassusillit teknologi inuup sananeqaataanut ilisarnaatitut takussutissanik misissueriaaseq nutaarluinnaq atorlugu kalaallit taamanikkut qanoq isikkoqarsimaneri qallunaap professorip Eske Willerslevip, ukiup ataatsip matuma siornagut paasivaa.
Willerslevip paasisaasa ilagaat, nunap inuii ukiut 4.000-t sinnillit matuma siornagut taartunik nujaqarsimasut, taartumik ameqarsimasut kajortunillu iseqarsimasut - timaallu - issittorsuugaluamiluunniit inuunissamut - sananeqaatimikkut naleqqussarluarsimasuusut.
Kalaalitoqqat aamma qapeqqalernissamut qanittuaraasimapput, siutaanniittullu minit assut panertarsimallutik - tamannalu ilaatigut siutip igalaasaata iluatungaani aseruuttooqqajaanermik kinguneqartartoq ilisimaneqarpoq.
Eske Willerslev kalaalitoqqanik misissukkani tunngavigalugit nunarsuarmi ilisimaneqalerpoq, maannalu tassa nunarsuarmi inuup sananeqaataanut ilisarnaatitut takussutissanik misissuisarfik - dna-mik ilisimatusarfik - Københavns Universitet-ip ataani aallartittoq pisortaaffigisussanngorpaa.
Ilisimatusarfik - Center for Geogenetik - ilaatigut inuit uumasullu qangarsuaq inuusimasut qanoq isikkoqarsimasinnaanerannik paasiniaaviussaaq, nunarsuatsinni inoqaleqqaarneraniit ullumimut pisimasut nalunaarsoqqissaarneqassallutik.
