Inoorlaannguit amigartoorutaalersimasut
Peqqinnissamut aningaasartuutit qaffakkaluttuinnarput, naalagaaffimmi tunisat ataatsimut nalingannit, BNP-mit, allaat naleqarnerulerlutik, naalungiarsuullu inunngorneraniit inuunera tamaat aningaasartuutit 900.000 koruuniussapput, tassa akileraarutinut allanullu aningaasartuutinut akiligassaniit amerlanerullutik.
Allatut oqaatigalugu, Danmarkimi atugarissaarniaraanni aningaasartuutit isertitallu imminnut ataqatigiinngillat, tamanna isumasiusitsisarfiup liberaliusup, Ceposip misissuisitsinerani paasineqarpoq.
Ajornartorsiutit Nunatsinnut aamma atuupput, maanimi Akileraartarnermut Atugarissaarnermullu Kommissioneqalerpoq, taakkulu Namminersorlutik Oqartussat agguaasarnerat misissussavaat, atugarissaarnerup pitsanngorsarnissaa siunertaralugu. Isumaliutissiissutip immikkoortua Kommissionip februaarimi tunniutissavaa, isumaliutissiissullu tamakkiisoq 2011-mi februaarimi tunniutissallugu.
Økonomit Danmarkimi pisortaat, Mads Lundby Hansen, Ceposimi sulisoq, oqarpoq, politikerit aaqqissuusseqqipallassinnaappata pitsaanerpaassasoq.
Atugarissaarnissamut politikerit siunniussaannut tassa akissaqanngilagut. Taamaammat naalagaaffiup isertitaqarnerunissaa, aningaasartuuteqarpallaannginnissaalu, taakku isumagisariaqarpaat.
Danskit 200.000-it suliffissarsisariaqarput, taamaalilluni naalagaaffik akileraarutitigut isertitaqarnerulerniassammat.Tamanna immaqa ima anguneqarsinnaavoq:
Soraarnerussutisiat annikitsukkaarlugit ikiliartortinneqarsinnaapput; aatsaat 67-inik ukioqaleraanni soraarninngortoqartalerluni, aningaasanik ullormusianik pisartagaqarneq ukiut sisamaniit ataasinngortillugu, taavalu atorfillit 15.000-nik ikilisillugit, Mads Lundby Hansen oqarpoq.
