Motzfeldt: Innuttaasut taasitinneqarnerat Spaniap ataqqisariaqarpaa
Tunngaviusumik inatsisissaq pillugu Isumalioqatigiissitap siulittaasua Vivian Motzfeldt tusagassiuutinut nalunaarummi taama ilaatigut allaaserisaqarpoq.
Tunngaviusumik inatsisissaq pillugu Isumalioqatigiissitaq Cataloniap namminersulerusunneranut atatillugu oqallinnermut maanna akuliuppoq, Cataloniamiut Spaniami naalakkersuisunit pineqarnerat Nunatsinnit qisuariaateqarfigineqartariaqartoq Vivian Motzfeldt isumaqarpoq.
Cataloniamiut oktobarip aallaqqataani taasitinneqarput, taasiartortullu 90 procentii isumaqarput Catalonia Spaniamit avissaarluni namminersulertariaqartoq. Qinersisinnaatitaasulli akornanni 42,3 procentiinnaat taasiartorput.
AAMMA ATUARUK Spaniami pisoq Naalagaaffeqatigiinnermut ersisaarutaavoq
Cataloniami innuttaasut taasitinneqarnerat akueriniarnagu Spaniami naalakkersuisut nalunaarutigereerpaat. Tunngaviusumilli inatsisissaq pillugu Isumlioqatigiissitap maanna oqaatigaa Spaniami naalakkersuisut akuersisariaqartut:
- Cataloniami amerlanerungaartut isumaat suusupagineqarsinnaammat uagutsinnut tupinnarluinnarpoq. Ajortoqarpoq. Tunngaviusumik inatsisissaq pillugu Isumalioqatigiissitap siulittaasua Vivian Motzfeldt oqarpoq.
Cataloniami pisoq pillugu Naalakkersuisut Inatsisartulluunniit qisuariaateqanngippata allatut Isumalioqatigiissitaq taama qisuariaateqassasoq, Isumalioqatigiissitap oktobarip ulluisa arfernanni ataatsimiinnermi aalajangerpaa.
