Innuttaasut politikerinut tatiginnikkunnaarput
- Aperisatta amerlanerpaartaat politikerit innuttaasunik sullissinerminnik imminnut ajunngitsussamik suliaqarnerannik isumaqarnerat erserpoq.
Ilisimatusarfimmi ingerlatsinermut institutimi lektori Pia Vedel Ankersen misissuisitsisuusoq oqarpoq.
Innuttaasut isumaasa politikerit imminnut sullinnerat ersersippaat.
Ilisimatusarfimmi ingerlatsinermi instituttimi ilinniartitsisup Pia Vedel Ankersenip ilinniartullu inuit isumaannik tutsuiginartumik misissuititsereernerata kingorna, politikerit tutsuiginanngitsunik pissusilersoqattaareernerisa kingorna innuttaasut tatiginnikkunnaarnerat paasineqarpoq.
- Politikerit tutsuiginannginnerannut pissutaasut arlaqarput, tassani ilaatigut illunik akikinaarussilluni tuniniaanerit aamma eqqaasariaqarput. Innuttaasuttaaq ajunngitsumik inuuneqarnissaat eqqarsaatiginagu aqutsisut imminnut sullinnerat tatiginnikkunnaarnermut pissutaasoq, Pia Vedel Ankersen oqarpoq, nangillunilu.
- Oqaloqatigisatta 90 procentii isumaqarput, maannamut oqartussaaffiit tiguneqareersut eqqarsaatigilluarlugit sulissutigineqartariaqartut suliassaqarfiit amerligaluttuinnartinnagit. Tassani peqqinnissaqarfik eqqarsaatigineqarneruvoq tassami oqaloqatigisatta affangajai peqqinnissaqarfiup Danmarkimit ingerlanneqaruni ajunnginnerunissaa ilimagaat, Pia Vedel Ankersen oqarpoq.
Taamaakkaluartoq namminersorneq pillugu taasisitsinissami innuttaasut amerlanerit politikerit sulineri naammaginngikkaluarlugit taasinermi angernissartik aalajangiusimavaat.
