Innuttaasut peqqinnissaqarfimmut isumaat tusarusuppai
Agathe Fontainip inuit peqqinnissaqarfik qanoq misigisarneraat peqqissutsimullu tunngasunut sunik apeqqutissaqarnerat tusarniarpaa.
Nuummi innuttaasunik ataatsimiititsineq Fontainip sineriammi innuttaasunik ataatsimiititsisarneranut ilaavoq - Naalakkersuisorlu Nuummiorpassuit ataatsimiititsinermut takkukkumaartut neriuppoq.
- Peqqinnissaqarfiup nutarterneqarneranik suliaqarneq kiisalu peqqissutsikkut politikimi anguniakkat pillugit ammasuunissaq uannut pingaaruteqarpoq, Peqqissutsimut Naalakkersuisoq tusagassiuutinut nalunaarummini taama allappoq.
Illit aamma allanngueqataasinnaavutit. Agathe Fontain-imi oqarpoq ataatsimiititsinerni ilikkagaqartarluni.
- Innuttaasunik ataatsimiititsinermi oqaloqatigiinneq sulininnut pingaarutilimmik isumassarsiutaasarpoq, Agathe Fontain oqarpoq.
Nuummi katersortarfimmi nalunaaqutaq arfineq pingasut qeqqaniit qulit qeqqata tungaanut innuttaasunut ataatsimiititsisoqassaaq.
