Innuttaasut isumaat tusaajumavaat

Ilulissani Sermermiuni unnugu ataatsimiisitsisoqassaaq, Sisimiunilu sanaartornermik ilinniarfimmi aqagu ataatsimiisitsisoqassalluni.

- Aalajangersaasussanngorutta innuttaasut oqariartuutaat tusaasimagigut ersarittariaqarpoq, Demokraatit sinnerlugit inatsisartunut ilaasortaq Niels Thomsen Ilulissani innuttaasunik ataatsimeeqateqarnissaq sioqqullugu oqarpoq.

- Misissuinerpaaluit kingulliit takutippaat unammillernartumik inissisimasugut allanngortoqartariaqartorlu. Taakkua aallannguinerit ukiuni makkunani ingerlappagut ingerlattussaavagullu. Kisianni aalajangiivinnissaq pitinnagu pingaartipparput innuttaasut tusassallugit, ineriartornissamut qanoq siunnersuuteqarnersut, Niels Thomsen oqarpoq.

Kattusseqatigiit partiianit Knud Fleischer aamma Inuit Ataqatigiinneersoq Naaja Nathanielsen innuttaasunik ataatsimiisitseqataassapput.

Naaja Nathanielsenip inuiaqatigiinni atugarissaarneq ineriartortitsinerullu oqaluuserineqarnissaa pingaartippaa.

- Inuiaqatigiit ullumi ukiut 30 matuma siornamut sanilliullugu atugarissaarnerupput, kisianni tamanna suli pitsaanerusinnaavoq. Aamma aningaasaqarniarnikkut unammillernartoqarpoq, kissaatigullu tamaasa aningaasalersornissaat ajornakusoorpoq. Inuiaqatigiittullu anguniakkagut akissaqarnerpullu oqaluuserisariaqarpagut. Kalaallit Nunaannilu qanoq ineriartortitsisinnaavugut ukua kissaatigut piviusunngortissallugit, Naaja Nathanielsen aperivoq.

Akileraartarneq atugarissaarnerlu pillugit isumalioqatigiissitap Naalakkersuisullu aningaasaqarnermut isumalioqatigiissitaasa misissuinerini saqqummiunneqartut aallaavigalugit aningaasaqarnikkut tulleriissaarinerup allanngortinnissaa pisariaqartoq oqariartuutigineqarpoq. Tamatumalu pinnginnerani innuttaasut kissaataat tusaarusunneqarput.

- ukua paasisagut aalajangersaasussanngorutta pinngitsoorata nassatarisariaqarpagut, taavalu aalajangernitsinni aamma ersarittariaqarpoq innuttaasut oqariartuutaat tusaasimagigut, Niels Thomsen (D) oqarpoq.