Innuttaasut akuutinneqartarnissaat nalunaarusiarineqarpoq
Suliniutit innuttaasunut ulluinnarni attuumassuteqartut pillugit aalajangiisoqassatillugu, Inatsisartut kalaallit sinnerlugit akuersillutilluunniit naaggaarsinnaapput. Soorlu Maniitsumi alumiiniuliorfissaq imaluunniit Narsap eqqaani Kuannersuarni aatsitassarsiornissamik pilersaarutit taakkununnga ilaapput.
Immikkut ilisimasallit suliaata qiteqqunnera Genevemi sapaatip akunnerani uani nalilersorneqarpoq, Inuit Issittormiut Siunnersuisoqatigiiffianni, ICC-mi, siunnersorti, Sara Olsvig, tassani peqataalluni.
- Nunat Inoqqaavisa Pisinnaatitaaffii pillugit Naalagaaffiit Peqatigiit Nalunaarusiaat uummaarissuusoq tamanillu soqutigineqartoq oqallinnerit paasinarsisippaat. Taamaammat aalajangiinissamut suliat inuiaqatigiinnut tamanut naleqqussarneqartassapput.
Innuttaasut aalajangigassanut arlalitsigut akuutinneqarsinnaassapput.
"Pituttorsimanngitsumik, siuliatut ittumik paasissutissiissutigineqareersumillu akuersineq" tassani qitiusumik isumaavoq. Isumalu taanna ataatsimiinnermi oqallisigineqarpoq, Sara Olsvig nassuiaavoq.
- Soorlu annertuunik aalajangiisoqassatillugu innuttaasunut paasisitsiniaanerit pineqarput. Tamakku ammasuusariaqarput, ersarissuullutillu illuinnaasiortuussanatik.
Inuit Issittormiut Siunnersuisoqatigiiffiata Saamit Issittumi suleqatigiinni suleqatigai. Taakku siunnersuutigaat, immikkut ilisimasallit nalunaarusiaata inerneriumaagai nunat tamat malinneraat paaseriarlugu nangitsisussamik ujaasissasut.
Nalunaarusiaq immikkut ilisimasallit Inuit Pisinnaatitaaffii pillugit siunnersuisoqatigiinnut aappaagu tunniutissavaat.
