Innuttaasut akuunerulernissaat Naalakkersuisut neriorsuutigaat
Isummernissamut tunngavissiaq aatsitassarsiornermik suliassani paasissutissiisarneq, aamma innuttaasunik peqataatitsiniarneq qanoq siuarsarneqarsinnaanersoq inassuteqaatinik arlalinnik imaqartoq, Naalakkersuisut sisamanngormat kingullermik akuersissuteqarfigaat.
Inassuteqaatit assigiinngissitaarput, ilaallutik aatsitassarsiorfiutileqatigiiffiit suliassartik pillugu paasissutissiisarnerat qanoq iliornikkut pitsaanerulersinnaanersoq, aamma tusarniaanermik ingerlatsinerit nutaatut iluseqartut, aammalu suliaqarluni ataatsimiinnerit ingerlanneqartarneri, taakkunani immikkut ilisimasalinnik oqaloqateqarnissamut periarfissaqarluni.
- Isummernissamut tunngavissiaq tulluusimaarutigaara. Qinersinissaq sioqqullugu, qinersereernerullu kingorna, aatsitassarsiornermik suliassat pillugit ammanerulernissaq oqallinnerunissarlu sorsuutigisimavarput. Isummernissamut tunngavissiami innuttaasut qanoq iliorluta pitsaanerpaamik peqataatissinnaanerivut pitsaasorujussuarnik tunngavissaqarlualerpugut. Aatsitassanut Naalakkersuisoq tusagassiuutinut taama allappoq.
- True North Gemsip Qeqertarsuatsiaat eqqaanni rubinisiornermut suliassaanut tusarniaanerit aallartingajalerpata, inassuteqaatit pingaaruteqarnerat takuneqarsinnaalereersussaavoq, allappoq.
