Innuttaasunut kiffartuussilluarnissaq sulissutiginiarneqarpoq
Kommuninut ukioq manna ataatsimoortumik tapiissutissat Namminersorlutik Oqartussat kommunillu isumaqatigiissutiginngitsoormatigik Enok Sandgreenip ajuusaarutigaa.
Enok Sandgreen isumaqarpoq, aaqqissuusseqqinnerni, politikkikkut aalassassimaarnerit pissutigalugit, allaasimanngitsoq sipaarniarneq tassaasoq anguniassaq pingaarneq. Taamaattoqanngilluinnarporli.
- Aaqqissuussaanermik iluarsaaqqinneq, aamma nunap immikkoortuini ineriartortitsilluarnerunissamik siunertaqarpoq - aningaasarsiornikkut isumaginninnikkullu. Taamatullu ineriartortitsinissaq - innuttaasunik sullissinerup pitsanngorsarneqarnissaani naligiissarneqarnissaanilu pingaaruteqanngitsuunngitsoq - minnerunngitsumittaaq qitiusumit oqartussaasunit tapersersorneqartariaqarpoq, KANUKOKA-mi siulittaasoq erseqqissaavoq, eqqaasitsissutigaalu aaqqissuussaanermik iluarsaaqqinneq Namminersorlutik Oqartussat kommunillu ataatsimoorlutik suliassarimmassuk.
Suliassat aalajangiussat kommunit kattussuussuunnerisa kingorna arlalitsigut kinguaattooruteqartut Enok Sandgreenip aamma oqaaseqarfigai:
- Suliassaqarfinnik Namminersorlutik Oqartussanit kommuninut nuussisoqassaaq, taakkulu qulaajarneqareersimassapput, tamatumalu kingorna aningaasatigut tunngavissat erseqqissut tunngavigalugit neqerooruteqartoqassalluni, KANUKOKA-p siulittaasuata ukiortaami oqaaseqaanni naggaserpaa.
