Innuttaasunik ataatsimiititsineq aaqqissuisunit naammagisimaarneqarpoq

Aluminiuliorfissaq pillugu Sisimiuni innuttaasut ippassaq ataatsimiitinneqarmata Sisimiormiut 50-it missaanniittut ataatsimiigiarput. Ataatsimeeqataasut tupaallaatiginartumik amerlapput, Klaus Georg Hansen innuttaasunik ataatsimiititsisarnissanik aaqqissueqataasoq oqarpoq.
januaarip 12-at 2010 11:58

- Innuttaasunik ataatsimiititsinerni taamaattuni ataatsimiigiartut 150-it takkuttut takusarsimavakka, uanilu ataatsimiititsinermi taama amerlatiginissaat ilimagisimanngilara. Inuit 50-it takkussinnaappata iluatsikkumaartoq imminut oqarfigivunga, tassalumi tamanna eqquuppoq, Klaus Georg Hansen, Ineqarnermut, Attaveqatigiinnermut Angallannermullu Pisortaqarfimmeersoq oqarpoq.

Inuit apererusunnerat tupaallaatigaa taamaammallu oqallilluartoqartoq misigisimalluni.

- Oqallinneq ammasuusoq misigisimavunga, innuttaasut apeqqutaat assigiinngiiaarlutillu pitsaasuupput. Naalakkersuisut pingasut peqataasut naalaarput, isornartorsiuinermullu, tassa misissuisimanerit apeqquserneqarsinnaanerannut tunngasumut, paasinnillutik, Klaus Georg Hansen oqarpoq.

Ataatsimiititsisarnissanik siunniussaq naalakkersuisut suli attakkaat taassuma aamma erseqqissaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq