INNK suliniaqatigiiffinngortinniarneqarpoq
Maannamut Kattufittut ingerlaneq eqarpallaarsimavoq, tassa kattuffimmut ilaasortaasoqarsinnaammat aatsaat peqatigiiffiugaani.
Peqatigiiffiit/kattufittullu aaqqissuussaaneq nipilersortartut atukkaminnut pitsanngorsaaniarlutik suliniarnerannut killiliivallaartutut siulersuisunit isigineqarpoq. Taamaattumik nipilersornerup silarsuaani nipilersortartut atukkaminnik pitsanngorsaaniarlutik sulerusuttut ajornannginnerusumik suleqataalersinnaanerat anguniarneqarpoq.
Suliniaqatigiiffittut allanngortinnerani ajornannginnerusumik nipilersortartut ataasiakkaat peqatigiiffiillu ilaasortanngorsinnaalissapput. Peqatigiiffiit ilaasortanngorsinnaanerannut pissutaavoq illoqarfinni ataasiakkaani kommunemut suleqateqarnissami pisariaqarmat, soorlu sungiusartarfeqarnikkut.
Suliniaqatigiiffimmut ilaasortaasinnaapput nipilersortartut nipilersortartutut erinarsortartutulluunniit ingerlataqartut.
Tamanna ingerlanneqassaaq ataatsimeersuarnermi malittarisassat allanngortinnerisigut.
Ataatsimeersuarnermi peqataasoqassaaq Qaqortumiit, Nuummiit, Sisimiuniit, Aasianniit Uummannamiillu.