Inngili Qernertup ammaqqinnissaa qanilliallaqqippoq

Maarmorilimmi Inngili Qernertup ammarneqarnissaanut atatillugu sulisussanik ilinniartitsinissaq Namminersornerullutik Oqartussanit aammalu Uummannap kommuneanit allanillu susassaqartunit eqqartueqatigiinnermik ingerlatsisoqareersorlu, aalajangerneqarpoq, Saviminilerinermi Ilinniarfimmi pikkorissaanissaq ingerlanneqartalissasoq.

Isumasioqatigiinnerup malitsigisaanik innersuussutit arlallit sapaatip akunnerini tullerni timitalerneqartussaapput. Aatsitassarsioqatigiiffik Angus & Ross Ltd. suliakkerneqarpoq, sulisussanik pisariaqartitamik amerlassusaat sunillu piginnaasaqarnissaat pillugit nalunaarusiornissaminik. Tamatuma malitsigisaanik Sanaartornermik Ilinniarfik Uummannamilu Piareersarfik suleqatigiillutik aatsitassarsiorfimmi eqqaanilu sulinermik ilinniartitaanerit aaqqissuutissavaat.

- Aatsitassarsiorfiit ukiuni tullerni ammarneqartussat tallimaanissaat ilimanarluinnarpoq. Pinngortitami pisuussutit uatsinnut iluaqutaasinnaanerat qaffasinnerpaatissagutsigu suliassaq taanna angisooq suleqatigiilluta ingerlatissavarput, Naalakkersuisunut ilaasortaq Kim Kielsen oqarpoq