Inngili imarsiortoq

Inngilitut annaassisutut Danmarkimi Imarsiornermik Qullersaqarfiup Russit umiartortut pingasut ullumi annaappai. Danskit imarsiornermut oqartussaasui iliuuseqarallartillugit Russit ilaquttatik ilagalugit Kaliningradimi jullersiorsinnaalerput.

Umiartortut Russit umiarsuaanni “Alexa”-mi, Københavnip umiarsualiviata avataani juulimili kisaqqasumi inuttaagaluarput.

- Umiartortut naluaat umiarsuartik pisiarineqarsimanersoq tunineqarsimanersorluunniit. Akissarsisinneqarneq ajorput angerlarnissaminnullu akissaqaratik. Umiarsuarmi inuttaasut tallimaapput taakkualu angerlarnissaannut akiliukkumallugit neqeroorfigaavut. Russit pingasut neqeroorutitsinnut akuersipput juullimullu angerlarnissartik nuannaarutigisorujussuullugu, taama nutaarsiassaqartitsivimmut Ritzauimut oqaluttuarpoq Birgit Sølling Olsen – Imarsiornermik Qullersaqarfimmi allaffeqarfiup pisortaa.

Umiartortut sinneruttut marluk – Russeq ataaseq Litauererlu ataaseq – umiarsuarmiiginnarniarlutik aalajangerput. Taakkua Handelsflådens Velfærdsrådimit, juullimi tipaatsuutissaqaqqullugit koorimik juullisiutissaannik imalimmik tunineqassapput.

Umiarsuup isumannaatsuuneranut uppernarsaatit pappilissat arsaarinnissutigineqarsimapput umiarsuarlu aallaqqusaanngilaq. Maannalu pinngitsaaliissummik Danmarkimi tuniniarneqartussanngorpoq. Umiarsuaq juulip 18-anili kisarsimalerpoq, taamanili umiarsuarmik piginnittup inuttani akilerneq ajorsimammagit.