Innermik anitsineq sivisunerussaguni eqquinerlorujussuassaaq
Nunap sananeqaataanut ilisimattoq Poul Martin Holm oqarpoq, timmisartukkut angallannerup qaqqap innermik anitsineranit sap. akunnerini, qaammatini ukiorluunniit ataaseq angullugu akornusersorneqarnissaa sillimaffigiinnarneqarsinnaasoq.
- Tamanna ajoraluartumik takorloorpara, kisiannili taamaattuaannartussatut takorloornagu, ilimananngilarmi maannakkutut taamaaginnarumaartoq. Qaqqap innermik anitsinera kingullermik ukiup aappaa avillugu sivisutigaaq assigiinngisitaartumillu sakkortussuseqarluni, ilimaginngitsuugassaanngilarli anitsineq sivisunaarsinnaammat, naak siornatigut anitsisimanera ullunik pingasuinnarnik sivisussuseqaraluartoq. Taamaattumik qaqqap innermik anitsinerata qanoq sivisutiginissaa oqaatigiuminaatsorujussuuvoq, massakkullu sakkukilliartornera takussutissaqarani, Poul Martin Holm oqarpoq.
Arsakut qanoq annertutigisumik anianissaat tamatumani qanoq aalajangiisuussanersut Poul Martin Holm aperineqarami akivoq:
- Arsakut annertussusianni innermik anitsinerup qanoq sakkortutiginera qaarnerillu qanoq sakkortutiginerat apeqqutaapput. Anitsineq sakkortoorujussuunngilaq, tamatumanilu imaanngikkaluarpoq arsakut amerlasoorujussuussasut, sermilli aajuitsup ataani innermik anitsinermut atatillugu, imeq annertoorujussuaq ujaqqamut aalluni kuuttumut akuliuttarpoq, taamaaligaangallu qaartoornerujussuit pisarlutik, taakkuuppullu arsakorpassuarnik qummukaalersitsisartut. Anitsinerli taamaaginnarpat iniminiiginnarlunilu quppami tassaniiginnarpat, taava sermeq eqqaaniittoq aattuussaaq qaarnerillu sakkortuut unillutik. Taamaalilluni neriuutigineqarsinnaavoq taakkua maannakkut inigisaminniiginnassasut arsakullu pinngorartut ikiliartulerumaartut.
Sialuup seernartup svovlitallillu ulorianaateqarnera pillugu allaatigisaqarsimammat innermik anitsinermut tamanna qanoq attuumassuteqarnersoq aperineqarami Poul Martin Holm akivoq:
- Aap, ujaqqami aattumi anitsinermit pisumi akuliusimasumik syreqarpoq, taassumalu ilaa annertoqisoq aalanngortarpoq ujaqqamilu aattumi qalattarluni, syrillu ilaat arsakut siorartaannut igalaaminiusunut nippussuuttarput mikisuararsuanngorsimagaluaqalutilli, taavalu angallanneqarlutik. Islandimi namminermi tamanna assut ajornartorsiutaalersinnaavoq, paasivaralu naasorissaasut nersutaatitik isersimatiinnaqqullugit siunnersorneqarsimasut, DR taama ilisimatitsivoq.
