Innermik anitsineq sakkukillineruvoq
DR-p ilanngutassiortuata Thomas Ubbesenip Reykjavikimiit kangimut innermik anitsisartup Grimsvötn-p tungaanut biilinik ullumi ingerlaartilluni takusani ima oqaluttuarai:
- Naak silaannaq anoreqanngikkaluartoq taammaattoq nunami misigisaq ingasalluinnarppoq. Innermik anitsisartup eqqaani aqqutigeqqusaanngitsumiippunga, allaanngilarlu filmimut piviusuusaartitamut ilaalluni. Ullup qeqqarigaluara taartuinnaavoq, arsakut aqqusinikkut teqqalapput, isikkiveqanngingajallunilu. Allaanngilaq nunarsuarmi allarluinnarmi tikilluaqqusaaffiunngitsumi najugaqarluni - isigisaq eqqumiilluinnartoq, Thomas Ubbesen Island-p kangiatungaaniit biilertilluni oqaluttuarpoq.
Nunarujussuaq inoqanngingajattoq oqartussanit matuneqarsimavoq, kisiannili innermik anitsisartup anitsiunnaarnissa utaqqiinnarsinnaavarput, allatummi iliuusissaqanngilagut.
Inuit innermik anitsisartup qanitaani najugaqartut ingerlaarfigeqqusaanngitsumiit tassungalu biilerlutik ingerlasarput. Anisarput nalunaaquttap akunnerpaaluini silaannarik najuussorniarlugu. Tamatuma kingorna uteqqittarput uumasuutitik illutillu nakkutigiartorlugit.
Anitsinerup kinguneqaataasa ilagaat, sermitarsuit nalinginnaasumik qaqortuinnaasaraluartut maanna arsakunit pissuteqartumik qernertuinnanngorsimammata.
Islandimi ujarassiuup oqarnera naapertorlugu, sikup imaluunniit sermip nalinginnaasumiit arfineq marloriaammik aajaarnerunera tamatuma kingunerissavaa. Tamannalu qaqqaniit pisunit kuussuarnik qarsutsisunik inuunermik naviarnartorsiortitsisinnaasunik pilersitsinissamut aarlerilersitsivoq, Thomas Ubbesen Islandimiit naggasiivoq.
