Innermik anitseqqittoqalernera Air Greenlandip timmisartuussineranik eqquivoq

Air Greenlandip København-imiit Kangerlussuarmut uterlugulu ataasinngornermi maajip 23-ni timmisartuussinissaa ajoraluartumik taamaatittariaqarpoq, Islandimi innermik anitsisartup Grimsvøtn-ip anitsinerata kingorna, Air Greenland taama ilisimatitsivoq.
Allattoq Najaaraq Egede
maajip 22-at 2011 17:36

Islandimi oqartussat Islandip silaannartaa piffissami aalajangersimasuunngitsumi matugallarpaat. Taamaattumik Air Greenland illersorneqarsinnaasumik isumannaallisaanermut malittarisassat tunngavigalugit timmisartuussinissanut pilersaarutit eqqortissinnaanngilai. Tassa Atlantikup avannaani allamut mittarfimmut ingerlariataarsinnaannginneq aammalu arsakut 15 km-nik qummut qullaassat aqqusaarnissaat illersorneqarsinnaanngimmat. 

Nunatta tungaanut ilaasussat 245-t utimullu 166-it timmisartuussinerit ingerlaqqilerpata inissanut siullernut inissaqartinniarneqassapput. Air Greenlandip EU-mi maleruaqqusaq nr. 261 naapertorlugu pisussaaffini tunngavigalugu Danmarkimiit ilaasussat unnuineri nerisaqarnerilu pisariaqartitsineq naapertorlugu isumagissavaa.

Ilaasut Kalaallit Nunaanni angalasussat imaluunniit Kalaallit Nunaanniit aallartussat, namminneq angalanermi sillimmasiisarfiinut innersuunneqarput, pisoq ajunaarnersuummat kimilluunniit aqunneqarsinnaanngitsoq.

Ilaasut pisinnaatitaaffi annertunerusumik quppersakkami "Illit pisinnaatitaaffitit"-mi atuarneqarsinnaapput, taanna najukkami mittarfimmi pissarsiarineqarsinnaavoq ataaniluunniit aaneqarsinnaalluni:

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq