Innarluutillit siunnersortissaaleqipput

Siunnersuineq, najugaqarneq, timersorneq kiisalu ilinniartaanerat ilaatigut qulequtarineqarlutik innarluutillit ilaqutaasullu 74-it missaanniittut atukkatik pillugit oqallipput.

- Qulaajaasoqarpoq. Kommunemit arlalitsigut sumiginnaasoqartarpoq, oqallinnermik aaqqissuisoq Poul Erik Christensen oqarpoq.

Oqaluuserineqartut pingaarnerit ilagaat siunnersorneqartarneq. Siunnersorneqartarneq oqallisigileratsigut isummat assigiinngitsorpassuupput. Paasinarsivorlu Kalaallit Nunaanni innarluutillit arlaannaatigulluunniit siunnersuisorneqartanngitsut.

Poul Erik Christensen, Kalaallit Nunaanni innarluuteqarneq pillugu Sisimiuni ippassaq oqallitsitsinermik aaqqissuisoq oqarpoq. Oqallinnermi innuttaasut 74-it peqataapput, taakkunannga 55-it innarluuteqartuullutik. Innarluutilinnut atugassarititaasut, soorlu najugaqarniarnikkut, timersorsinnaanikkut, pisiniarfilerisinnaanikkut, ilinniartitaanikkut kiisalu innarluuteqartuusutut inoqatinit isigineqartarneq oqaluuserineqarput. Innarluutillillu kommunimit peqqinnissaqarfimiillu sumiginnarneqartarnertik aamma oqaluuseraat.

- Isiginiarnikkut innarluutilik ilinniagaqarniarnermini kommunimit sumiginnarneqarnini pillugu oqallinnermi oqariartuuteqarpoq. Atuarfimmini qinngasaarneqartarnini pillugu ikiorneqaranilu siunnersorneqanngilaq. Ilami ima oqarfigineqarpoq kissaatigineqarani. Innarluutillit atuarfinni ajornartorsiuteqaraangata siunnersorneqartanngillat, kinaana taamatut pisoqaraangat saaffigineqartartussaq? Poul Erik Christensen aperaaq. Innarluutilinnut angajoqqaat iliuusissaaleqileraagamik ajornartorsiortarput, tassami qitornatik atugarliortut isigisaramikkit, Poul Erik Christensen innarluutilimmik panilik nassiuaavoq. Taanna neriuppoq innarluutilinnut siunnersuisarfeqalerumaartoq.

- Neriuutigivara namminersortumik siunnersuisarfeqalerumaartoq. Innarluutillit kommuninut imaluunniit allanut tunngatillugu ajornartorsiuteqarpata inatsisilerituumut saaffiginnissinnaalerumaartut. Siunnersuisarfiullu kommunit imaluunniit Namminersorlutik Oqartussat eqqunngitsulioraangata iliuuseqarfigisinnaassalissagai, Poul Erik Christensen oqarpoq.

Innarluuteqarneq pillugu oqallinnermi oqariartuutigineqartut Poul Erik Christensenip maanna nalunaarusiaralugit suliarai, taakkualu inatsisartunut ingerlateqqissavai.

MIPI, Innarluuteqarneq pillugu Nuummi februaarip qiteqqunnerani aamma oqaliititsissaaq.