Innarluutillit ilinniartitaasalissapput

Innarluutillit pisinnaatitaaffeqarnissaat pillugu FN-ip decembarimi aalajangiussaa naapertorlugu maanna nunatsinni naalakkersuisut aamma kissaatigilerpaat nunatsinni innarluutillit ilinniartitaanerat, suliffeqarnerat kiisalu sulinngiffimmi sammisassaqartitaanerat qulakkeerniarneqalissasoq. Tamannalu tassa maajip 14-ianiit 16-iata tungaanut Nuummi ataatsimeersuassutigineqassaaq.

FN-p aalajangersagaa taanna atortussanngortinneqassaaq – sulilu atuutilerfissaa ulloq nallinngikkaluartoq akuersissutigineqassalluni – taamaalilluni FN-p maleruaruaqqusaa naapertorlugu nunatsinni innarluutillit pisinnaatitaaffeqalissallutik.

Ilaqutariinnermut naalakkersuisup Aleqa Hammondip – ataatsimeersuartoqarnissaanut innarluutillit sinniisaat peqatigiiffii, taamalu inuit innarluuteqarnermut ilisimasallit misilittagallillu ataatsimeersuarnermut qaaqquai taamaalilluni innarluutillit ilinniartitaanerat, peqqissarnissaat, suliffeqarnerat kiisalu sulinngiffimmi sammisassaqartitaanerinut tunngasunik oqallittoqarsinnaaqqullugu.

Oqaatigineqarportaaq ataatsimeersuarnermi innarluutillip ulluinnarni atugaat, inunnut attaveqartarnerat, peqatigiiffinnut akuunerat taamatuttaaq teknikkikkut ineriartorneq tamatuminngalu innarluutilinnut ikiorsiinerit minnerunngitsumillu atoqatigiinneq eqqartorneqassasut.

Ataatsimeersuarnerup nalaani meeqqat inuusuttullu innarluutillit atugaat pillugit saqqummersitsisoqassaaq qulequtserlugu ”Siunissami sinnattukka”