Innarluutillit Danmarkimut nuukkusuttarput

Vilhelm Langep majuartarfikkut nakkarnermigut qungatsini 1999-imi napimmat, qungatsiminit ammut nukillaarpoq, ullumikkullu susinnaajunnaavinnikuulluni. Talia saamerleq nukeqalaaminerpoq eqqarsartaasialu akornuteqarani.

Vilhelm Langep nuliata uini ikiorniarlugu meeqqerivimmi ikiortitut ukiuni qulini suliffigisimasani ukioq 2000-imi qimappaa. Uimili paarineranut nuliaasoq killilimmik aningaasalersorneqarpoq, tapeqartinneqarani, napparsimatitsisinnaanani feeriarsinnaatitaananilu.

Uffa Vilhelm Lange allamik ataatsimik sulisoqaraluartoq. Ilaqutariit illoqarfimminni parnaarussaaqqasutut misigipput, pisinnaatitaaffeqanngitsutullu aamma kommunimit sumiginnagaasutut misigalutik, taamaattumik ilaqutariit sisamanik meerartallit Maniitsumi pisortanit ikiorserneqarnertik naammagiinnalivippaat, allaallu Danmarkimut nuunnissartik eqqarsaatigisalerlugu.

Taakkua kisimik taama eqqarsartanngillat. Ilaqutariit allat Nuummi najugallit arfineq-pingasunik ukiulimmik inunngorami iltimik amigaateqarnini pissutigalugu sutigut tamatigut ikiortarialimmik meerallit, Danmarkimut nuunnissartik akuttunngitsumik eqqarsaatigisarpaat. Lonnie Andersen, Iterluarnaami ullaaq ima oqarpoq:

- Ilaatigooriarluta sakkortoorujussuarmik misigilertarpugut allatut ajornaqaaq Danmarkimut nuuttariaqarpugut. Atuarunnaaruni Niclas sussagami. Siunissaq takorlooruminaangaarmat ilaanikkooriarluta misigisarpugut allatummi ajornaqaaq nuuttariaqassuugut.

- Aallassaguttali ilaquttagut tamaviisa, isertartut kammalaatigullu qimallugit aallartariaqassaagut. Pinngitsuunngiivilluni Niclasimut sunniuteqassaaq. Taama misigitikkusunnagu imminut noqittarpunga: Naamik, tamaani sukataassuugut, kisianni aamma sukataakatannarsisarami, qasunarsisarami.

Lonnie Andersenip aappaatalu ernertik ulloq unnuarlu nakkutigisariaqartarpaat, ulluunerani tapersersortimik støttepersonissaqannginnamik. Ilaanneeriarlutik eqqarsaatigilersarpaat Danmarkimiittuugunik ernertik allamit paarineqartillugu namminneq inuttut ataasiakkaatut aappariittullu inuusinnaagaluarnertik.

- Ilaannikkut pisariaqartitsinartarami aamma immaqa Danmarkimut aallaannarutta Niclas ikiorneqarluni uagullu angajoqqaagulluta atualersinnaaniassunga imaluunniit sulilersinnaaniassaanga.

Lonnie ANdersenili kisianneqartitsivoq.

- Imminut eqqarsaatigileraangama Danmarkimut nuukkusuummertarpunga, kisiannili nej, kalaaliuvugut uagut aamma pisinnaatitaasariaqarpugut. Nunatsinni, Lonnie Andersen oqarpoq.

Innarluutillit nunatsinneersut 100-t sinneqalaartut ullumikkut Danmarkimiipput.

Nunatsinnilu innarluutilittut nalunaarsorsimasut maanna 1.000-t sinneqalaarput.