Innarluutillit atuartinneqarnissaat ajoqutissaqartinneqanngilaq

Innarluutillit marluuppata ataasiinnaappalluunniit sunngiffimmi atuartitsinerup ataani atuartinneqarsinnaammata akorngutissaqarsorineqanngilaq Specialcenterimiit atuartut tallimat atuarfiup ataaniitsikkunnaarneri Namminersornerullutik Oqartussat oqarput.

Meeraq innarluuteqarpat innarluuteqanngippalluunniit peqqussutit nalunaarusiallu pigineqartut Namminersornerullutik oqartussaniit naammattutut isigineqarput. Meerarlu innarluutilik ukiuni qulini atuarfimmeereersimasoq atuarteqqinniaraanni tassuunaarsinneqaannassasoq oqaatigineqarpoq. Ilinniartitaanermut nakkutilliisumut Kaali Olsenimut apeqqutigigatsigu sunngiffimmi atuartitsinermut najoqqutassat innarluutilinnut inatsisitut isigineraat ima akivoq:

- Innarluutillit inatsisaattut isiginngilarput kisianni kikkunnut tamanut atorpoq tassanilu innarluutillit atuartinneqarnissaat aamma immikkut eqqaaneqarnikuulluni.

Kaali Olsenip erseqqissaatigaa sunngiffimmi atuartitsinerup ataani nalinginnaasumik aatsaat tallimat atuarniaraangata piviusunngortinneqarsinnaasartoq kisiannili innarluutilinnut atatillugu innarluutillit marluugaangata atuartitsineq piviusunngortinneqartussaanerarpaa immikkullu akuerineqarsinnaanerarpaa innarluutillip ataasiinnaalluunniit atuartinneqarnissaa.

Namminersornerullutik Oqartussaniit oqaatigineqarpoq matumani aamma ilinniartitsisut akissarsiassaat apeqqutaatinneqarsimasinnaasut, tassami atuarfikkoorlugu immikkut ittumik atuartitsineq 511 kroneqarmat sunngiffimmilu atuartitsinikkoorlugu 288 kroneqarluni. Kaali Olsen ima oqarpoq:

- Tassa taanna isumaqatiginninniarnermut tunngavoq akissarsianik isumaqatiginninnermut tunngavoq taannalu uanga tunginninngaaniik akuleruffigisinnaanngilara maannakkut isumaqatigiissutaasut taamaapput.