Innarluutillit angalasinnaanerannut aningaasartuutit annikillerujussuarput
Tamatuma kinguneranik kalaallit innarluutillit Danmarkimiittut sivikitsuinnarmik Kalaallit Nunaannut tikeraarsinnaalerput.
Kalaaleq innarluutilik, Suulut Gørlevimi innarluutillit angerlarsimaffianni najugalik oqaluttuarpoq, tikeraarluni angalanini ilaquttamilu takoqqinneri nuannaralugu.
Suulup ilaquttani ukiumut marloriarluni siornatigut tikeraartaraluarpai, katillugit sapaatip akunnerini arfinilinni najorsinnaasarlugit. Maannakkuli ukiumut ataasiarlutik sapaatip akunnera sinnilaarlugu tikeraarsimasinnaavai. Innarluutilinnik nakkutilliisoq, Jakob Larsen oqarpoq kalaallit innarluutillit pisartagaat maanna ima ikitsigilersut ukiumut arlaleriarlutik angalasinnaajunnaarlutik. Namminersornerullutillu Oqartussat neqeroorutaat, tassa katillugit ulluni qulingiluani tikeraarsinnaanerat naammagiinnartariaqaraat. Innarluutillit angalanerat ikiorteqarnerallu Namminersornerullutik Oqartussat akilertussaasarpaat.
- Innarluutillit tikeraarnerannut atatillugu aningaasartuutit killilersimaartariaqaratsigit ilanngartuisariaqarsimavugut, Ilaqutariinnut Peqqinnissamullu Naalakkersuisoqarfimmi pisortaq, Martha Lund Olsen oqarpoq.
Innarluutillit Kalaallit Nunaanniittut ikiorteqartariaqartut aamma ukiumut ulluni qulingiluaannarni Kalaallit Nunaata iluani tikeraarsinnaalerput.