Innarluutillit allatulli pisinnaatitaaffeqarlutillu periarfissaqartariaqarput
Innarluutilinnut politikkiliornermi Innarluutillit innuttaasutut allatulli pisinnaatitaaffeqarlutillu periarfissaqartariaqarnerat, kommunersuassap Maniitsup Sisimiullu ataatsimiissutigissavaat.
oktobarip 10-at 2007 05:25
Ataatsimeersuarneq kommunit marluk taakku aallartitaannit peqataaffigineqartussaq ullaatungaa nalunaaqutaq qulingiluanut aallartissaaq.
Innarluutillit innuttaasunit allanit allaanerunngitsumik siunissami qanoq pineqassanersut politikerit atorfilittallu piareersassagaat, Sisimiuni isumaginninnermut ataatsimiititaliami siulittaasoq, Alfred Olsen oqarpoq.
- Innarluutillit suliffinnut inuttaannut naleqquttunut atorneqarnissaat pingaartorujussuuvoq, oqarpoq.
Innarluutilinnut naleqquttunik sanaartornerit ataatsimeersuarnermi aamma eqqartorneqassapput.
- Inuussutissarsiutinik ingerlatsisut aamma akisussaaffeqarput, Alfred Olsen oqarpoq.
Ataatsimeersuarneq ullumi aqagulu ingerlanneqassaaq.
