Innarluutilinnut najugaqarfinni tamangajanni kinguaassiuutitigut kannguttaatsuliortoqarsimaneranik pasitsaassisoqaqqasoq

Ulloq unnuarlu najugaqarfimmi, Ivaaqqami najugaqartoq 23-nik ukiulik, annertuumik innarluuteqartoq, naartusoq kimilluunnit ilisimaneqarani 2022-mi septembarimi ernimmat naalakkersuisut nunatsinni ulloq unnuarlu najugaqarfissatut neqeroorutini nakerisarsiunngitsumik misissuisitsipput.

Misissuineq maanna naammassivoq, pingasunillu nalunaarusiartaqarluni, taakkunannga ataaseq inunnut innarluutilinnut ulloq unnuarlu najugaqarnissamut neqeroorutini kinguaassiuutitigut kannguttaatsuliornermut tunngalluni.

Meeqqanut inuusuttunullu naalakkersuisoqarfik tusagassiuutinut nalunaarummi allappoq.

Misissuinermi ulloq unnuarlu najugaqarfissatut neqeroorutini tamani ataaseq kisimi pinnagu ineqartunut kinguaassiuutitigut kannguttaatsuliortoqarsimaneranik pasitsaassaqartut imaluunniit ilisimasaqartut takutinneqarpoq.

Aqutsisut imaluunniit sulisut kannguttaatsuliortoqarsimaneranik ilisimannittuupput. Suliat ilaanni sulisut ilanngutitinneqarnikuusimapput sulianilu allani illoqarfimmi inuit allat ilanngutitinneqarnikuusimallutik.

Ivaaqqamut tunngatillugu suliami angut 62-inik ukiulik kannguttaatsuliortuusoq ulloq unnuarlu najugaqarfimmi sulisuuvoq.

Aqutsisut ilisimannittutut uppernarsaateqartut

Nalunaarusiap suliarineqarnerani nunatsinni ulloq unnuarlu najugaqarfinni aqutsisut sulisullu oqaloqatigineqarput. Tassanilu assigiinngitsorpassuit ilisimannittutut uppernarsaateqarput.

Ataaseq angummut sulisumut najugaqartumik atoqateqarniarsimasumut tunngavoq. Tamanna aqutsisup oqaluttuaraa.

- Anguteqarpoq maani immikkoortortaqarfimmi sulisarnikuusumik. Taanna aamma 2022-mi ingerlaannartumik suliunnaarsinneqarpoq. Taanna sullitaminut misileeriaraluarnikuuvoq, aqutsisoq nalunaarusiami oqarpoq.

Aqutsisup allap illoqarfimmi innuttaasut najugaqartullu akornanni kinguaassiuutitigut kannguttaatsuliornermut tunngasumik pisoqarnikuusoq oqaluttuaraa.

Taakku inoqutinut attaveqaatitigut assersuutigalugu attaveqarfigineqalersinnaapput.

- Aap, ineqartut ilaat nunaqqataasunik naleqqutinngitsumik attaveqaqateqartarnikuupput. Taava ineqartoq oqaloqatigisarparput, oqaluttuullugulu suna eqqortuunnginnersoq. Ineqartut paarigivut oqaluttuunniarsarisarpavut.

- Arlaannik ingasaassisumik imaluunniit eqqumiitsumik pineqassanngillat. Illoqarfimmi inuit ilaasa ineqartut atoqatiginiarlugit attaveqarfigisaraat misigisartorujussuuarput, arlaannik pilerisaarlugit imaluunniit allatut iliorlutik. Taava politiit attaveqarfigisarpavut, politiillu suliassaq suliarisarpaat, aqutsisoq oqarpoq.

Ulloq unnuarlu najugaqarfimmut neqeroorummi najugallip innarluuteqartut kinguaassiutitigut kannguttaatsuliorfigineqarnissamut innarlerneqarnissamulluunniit aarlerinartorsiornerusarnerat siammasissoq nalunaarusiami inerniliissutigineqarpoq.

Innersuussutit

Nalunaarusiaq arlalinnik innersuussutitaqarpoq.

Kinguaassiuutitigut kannguttaatsuliornerup sammineqarnerata saniatigut najugaqartut kinguaassiutitigut pisariaqartitaat pissusilersuutaallu aamma misissorneqarput.

Tamatuma saniatigut nunarput tamakkerlugu kinguaassiutinut tunngasutigut pinnguaatinik pisinissamut maleruagassiortoqarnissaa siunnersuutigineqarpoq, najugaqartorpassuimmi aappaqanngillat, taamaammallu kinguaassiuutitigut pisariaqartitaminnut atatillugu pinnguaateqarnissaq iluaqutigisinnaavaat.

Nunatsinni ulloq unnuarlu najugaqarfinni tamani sulisut kinguaassiuutit pillugit atuartinneqarnissaat innersuussutigineqarpoq, taakku taamaalillutik ineqartunut kinguaassiuutit pillugit oqaloqatiginnissinnaaneq ilinniassallugu.

Tamatuma saniatigut sulisunut nutaanut ineqartut kinguaassiuutitigut atugarissaarnerat pisinnaatitaaffiilu pillugit pikkorissaassutigineqapallattariaqarpoq. Kiisalu kinguaassiutitigut pisinnaatitaaffiit, pisariaqartitsineq aamma kinguaassiuutitigut innarliisoqarnissaanut pinaveersaartitsineq ulloq unnuarlu najugaqarfinni tamani perorsaanikkut sammineqartariaqarpoq.