Innarluutilik angerlarsimaffimmini mattussaaqqasoq

Innarluutilinnut sullissinerup arriippallaammik ingerlasarnera, innarluutillip Jens Karl Mathiasenip Sisimiuneersup, misillerfigingaatsiarpaa.

Isaariani iluarseqqullugu kommunemut siornali qinnuteqartarsimagaluarpoq. Suliarli sumut killinnersoq paasiniaraangamiuk INI A/S-imut innersuunneqartarpoq.

- INI A/S-mullu sianeruma kommunimut innersuunneqartarpunga, saaffissaaleqineq naalliunnaqaaq, Jens Karl Mathisen oqarpoq.

Jens Karl Mathiasenip sanasutut ilinniarnini suli naammassinagu paasivaa nappaammik Sarkoidosemik napparsimalersimalluni. Ullormut arlaleriarluni noqarsinnaasarpoq ilisimajunnaarnermik kinguneqartumik.

Jens Karl Mathisen sapaatip akunneranut 40-tiimit ikiorteqartaraluarluni piffissap ilarujussua kisimiittarpoq, taamaammallu ajortumik pisoqarsinnaanera inuttaata takorlooruminaatsippaa.

- Kisimiillunga ikuallattooraluaruma qanoq iliussanerpunga, tassami imminut ikiorsinnaannginnama, Jens Karl Mathisen.

Illoqarfigisamini pisortanut toqqaannarluni saaffiginnissinnaalernissani qilanaaraa.

- Iluarunartorujussuuvoq, nalunaaraangama sorpassuit aqqusaaqqaarlugit atortussakka piniaaluttarakkit, Jens Karl Mathisen oqarpoq.