Innaarsunni ulorianartutut nalunaaqutsiineq atorunnaartoq
Innaarsunni ulorianartutut nalunaaqutsiinerup atorunnaarsinnissaa politiit Avannaatalu Kommuniani upalungaarsimasut isumasioqatigiinnikkut aalajangerpaat. Tamanna tusagassiuutinut nalunaarummi paasissutissiissutigaat.
Allattoq Kenneth Elkjær
juulip 18-at 2018 14:28
Taamaammat innuttaasut angerlaqqusaasimanngitsut kingulliit illuminnut angerlarsinnaalerput pisiniarfiillu ammaqqissinnaalerlutik. Meeqqalli pitsorluttullu sissap qanittuaniinnginnissaat talittarfimmiinnginnissaallu kaammattuutigineqarpoq.
Iluliaq ulluni kingullerni nikissimanngitsoq politiit ilisimatitsissutigaat. Arlaleriarlunili aserorsimavoq iluliarlu millisimasoq ilisimatitsissutigalugu.
Nunaqarfik innamit Innaarsuit avannaata tungaata isuaniittumit, ilulissap qaninnerpaaffigisaaniittumit illersorneqartoq aamma nalilerneqarpoq.
Politiittaaq innuttaasut iluliami annertuumik allannguuteqarnissaa alaatsinaaqquaat, annertuumillu pisoqassappat oqartussat kalerreqqullugit.
AAMMA ATUARUK Innaarsuit eqqaannit ilulissap illikarnera takuuk