Innaallagisserisut tillinniarfigitinnertik erloqissutigaat
Qarasaasiat angallattakkat tallimat suliffimmut paasissutissanik pingaaruteqarluinnartunik imaqarmata tillitat utertinneqarnerannut ikioqquvoq. Tillinniarfigineqartut tassaapput Qulleq ApS, innaallagialerinermik suliallit.
Paasissutissat soorlu sullitanut, suliffeqarfimmut namminermut avammullu attaveqaatinut tunngasut, soorlu aningaaserivinnut tunngasut, qarasaasiat angallattakkat iluiniipput, taamaammat tigoqqikkusoqaat.
Qulleq sisamanngormat tillinniartoqarmalli ujaasilerpoq. Tillinniarsimanerup politiinut nalunaarutiginerani qarasaasiat nutaajutillutik 50.000 koruunit tungaanut akeqarsimassasut nalunaarutigineqarpoq.
Naallu Nuup radioagut Nuuk FM-ikkut Qulleq ujaasinermik nalunaaruteqartitsigaluartoq maannamut kinguneqanngilaq.
Qarasaasiarli ataaseq maannamut nassaarineqarpoq, sunaaffa pisisimasup tallimanngormat takusinnaasimagaa suliffeqarfiup Qulliup qarasaasiaatigigaa, suliffeqarfimmullu siarngutigalugu. Qarasaasiap iluaniittut paasissutissat piiarneqarsimapput allanillu ilaartorneqarsimallutik. Tillitaasoq pasitsaanneqarpoq, qarasaasiallu normua malillugu ilumut tillitaasimasoq paasineqarpoq.
Aamma paasineqarpoq qarasaasiaq tillinniartuusimagunartumut tunngasunik paasissutissanik immerneqarsimasoq. Taamaammat Qullermiut neriupput qarasaasiat angallattakkat sisamat sinneri nassaarineqajaarumaartut, amigaataammata.
Nuummi tillinniarnerit imaaginnavipput, suliaqutaangaarmatalu politiit qanittukkut nalunaarput tillinniarnernik paasiniaanerminnut nukiit atukkat annerulersinneqartut.
