Innaallagissamut, imermut, kiassarnermullu akit allannguuteqassapput

Ukiortaamiit tassa aqaguagumiit atuutilersussamik innaallagissamut, imermut kiassarnermullu akit allannguuteqassapput.

Taamatut akinik allanngortitsisariaqarneq peqquteqarpoq innaallagissamut, imermut kiassarnermullu akit assigiittussaanerisa allanngorneranik akit eqqornerusut atuutilernissaasa uuliallu akiata qaffannerata kingunerisaanik.

Assersuutigalugu Nanortalimmi, Kangaatsiami, Qeqertarsuarmi, Upernavimmi, Illoqqortoormiuni Qaanaamilu, kiisalu nunaqarfiit amerlanersaanni kilowatt-imut akigitinneqartoq qaffanneqassaaq.

Kilowatt-imut 2 koruunit 84 ooreqarsimariarluni 3 koruunit 15 ooreqalissaaq.

Qaffariaat 11 procentiulluni.

Akerlianik Qaqortumi, Narsami, Paamiuni, Maniitsumi, Sisimiuni, Aasianni, Qasigiannguani, Ilulissani kiisalu Uummannami akit appartinneqassapput.

Taamatuttaaq nunaqarfiit Qeqertarsuatsiaat, Kangaamiut, Ikerasak, Saattut Aappilattumilu akit appartinneqassapput.

Akerlianillu Tasiilami qaffaasoqassaaq, kilowatt-imut 2 koruunit 41 ooreqarsimariarluni 2 koruunit 69 ooreqalissagami.

Nukissiorfiit taama nalunaaruteqarpoq.

Taamaallaat Nuummi akit minnerpaaffissaat atuutissaaq. Tassa kilowatt-imut 1 koruuni 37 ooreqassagami.