Innaallagiaq akikillissaaq
Uulia Polaroil-ip aggustimi akikillivaa. Tamanna tunngavigalugu innaallagissamik atuinerup akikillinissaa, Nukissiorfinnit Naalakkersuisunut qinnuteqaatigineqarpoq, innaallagissap akia taamaalilluni innaallagissiornermi aningaasartuutinut naapertuutilerniassammat. Taamatullu qinnuteqaateqarneq akuerineqartoq, Nukissiorfiit nalunaarutigaat.
Innaallagissap akiata appartinneqarnera kingumoortumik atuutilissaaq, akillu nutaat aggustip allaqqaataanniit atuutilersinneqassallutik.
Innaallagissamut akiliutigineqartartoq, agguaqatigiissillugu kiloWattimemut 10 øremik appariassaaq. Tamannali Nuummi Sisimiunilu atuutissanngilaq, illoqarfinnimi taakkunani akit minnerpaaffissaanik akiliisoqartareermat. Illoqarfinni taakkunani akit 5 øremik appariassasut, Nukissiorfiit nalunaarutigaat.