Inissinneqarsimasut isornartorsiuinerat akerlilerneqarpoq

Pequtit nutaanngitsut aserfallassimasullu, uffarfiit ipertuut, init aserorteriffigineqarsimasut. Pineqaatissinneqarsimasut isumaqarput atukkatik isornarluinnartut, taamaammat Pinerluttunik Isumaginnittoqarfimmut Folketingillu Ombudsmandianut naammagittaalliuuteqarlutik.

- Inissinneqarsimasuni ilaqarpoq naalasseriitsutut nalilerneqarsinnaasut, inissiisarfimmeeqatiminnullu soqutigittaatsut. Naalasseriitsut taamaakkaangamik aneqqusaajunnartarput, taamaattoqaraangallu kamaqqajaasunngorsinnaasarlutillu soqutigittaannerulertarput. Eqqumiiginarsinnaagaluartumillu taakkuupput atukkatik pillugit isorinneqqajaanerusartut, Pinerluttunik Isumaginnittoqarfimmi pisortaq Thomas Nicolajsen oqarpoq.

Inissiisarfimmiittut ilaat, 42-nik ukiulik Tommy Møller, Thomas Nicolajsenip taamaasilluni aamma akissuteqarfigaa.

Tommy Møllerip ilaatigut oqaluttuaraa kingornuttakkamik nappaateqarnini pissutigalugu ukiumut sisamariarluni nakorsiartartussaagaluarluni. Nakorsiarnissaraluanili nassuiaatitaqanngitsumik kinguartinneqarsimasut.

Naammagittaalliuut kukkunernik arlalinnik, najugaqarfimmilu atukkat amigaataannik, ilaatigut aamma imaqarpoq.

Pinerluttunilli Isumaginnittoqarfiup pisortaata oqaatigaa pinerluuteqarsimasut inissiisarfii ukiuni makkunani iliuuseqarfigineqartut:

- Ukiut kingulliit eqqarsaatigalugit takusinnaavarput Kalaallit Nunaanni iliuuseqartoqartoq. Kalaallit Nunaanni Danmarkimilu aningaasaliinerit amerlagisassaanngikkaluartut iliuuseqartoqarpoq, inissiisarfimmiittulli ilaat maleruaqqusat malinneq ajoraat miserratigisinnaangilarput, Thomas Nicolajsen oqarpoq.