Inissinneqarnissaminnik utaqqisut amerliartuinnarput
Utaqqiisaasumik pineqaatissinneqarsimasunut inissiisarfik Kangerlussuarmiittoq aggustimili matuneqarmat, utaqqisut amerliartuinnavipput maannalu marloriaatinngorlutik, taamaalilluni massakkut utaqqisut 150-it missaanniipput.
Pineqaatissinneqarsimasunut inissiisarfimmiittussanngorlugit eqqartuunneqartut amerliartuinnarnerat ajornartorsiutaasoq, pinerlussimasunik isumaginnittoqarfiup pisortaata tullia Annette Esdorf oqarpoq.
- Ukiut kingulliit tallimat ingerlaneranni Kalaallit Nunaanni pineqaatissinneqarsimasunut inissiisarfinni inissat 65 procentimik amerlinikuuavut. Taakkualu amerlaqaat, tamannalu akikitsuinnaanngilaq. Isumaqarpunga sapinngisarput naapertorlugu malinnaaniarsimagaluartugut, tamannali naammassimanngilaq. Pineqaatissinneqarsimasunut inissiisarfimmiittussanngorlugit eqqartuunneqartartut amerliartuinnarput, aamma taamatut pineqaatissinneqartartut sivitsoraluttuinnartumik pineqaatissinneqartarput, Annette Esdorf pinerlussimasunik isumaginnittoqarfiup pisortaata tullia taama oqarpoq.
Taassuma tamatuma pinerlussimasunik isumaginnittoqarfiup qanoq iliuuseqarfiginiarneraa oqaatigiumanngilaa.
- Tamanna ullumikkut oqaatigisinnaanngilara. Taamaallaat oqaatigisinnaavara ajornartorsiutip qanoq iliuuseqarfigineqarsinnaanera maanna isumaliutersuutigigipput, tamannalu qanoq inerneqassanersoq maanna oqaatigisinnaanngilara, qaammatilli matuma ingerlanerani iliuusissatsinnik nassaarsinnaanissarput neriuutigaara, Annette Esdorf oqarpoq.
Aamma taassuma utaqqisut qaqugu ikiliartulersinnaanerat oqaatigisinnaannginnerarpaa.
- Taamaallaat oqaatigisinnaavara qaqugu iliuuseriniakkatsinnik piareersimatitsisinnaanerluta, kisianni qaqugu piviusunngortinneqarsinnaanersoq oqaatigisinnaanngilara, taamaattorli ajornanngippat ukiormanna pisinnaanissaa neriuutigaarput, Annette Esdorf oqarpoq.
Pineqaatissinneqarsimasunut inissiisarfimmiittussanngorlugit eqqartuunneqartartut 1998-imiilli siornamut pingasoriaammik amerlisimapput, tassa 1998-mi 56-ioriarlutik siorna 199-iugamik.
