Inissiisarfinniit ingerlariaqqiffiit killeqarpallaarput
- Inuusuttut avatangiisiinut saaffiginnissinnaanerat, imaluunniit ilaqutaqartutut misigimanissaat pingaartorujussuuvoq, Rebekka Jørgensen oqarpoq.
Meeqqat 18-iliiffissaat qanilligaangat meeqqat angerlarsimaffianiinnerata sivitsorneqarnissaat qinnutigineqartarpoq.
- 18-iliigaluartulluunniit suli akisussaaffigigallarusullugit sivisunermik maaniinnissaat qinnutigisarparput ilinnialernerminni toqqammaveqarnissaat pingaartittaratsigu. Aamma ersarissorujuusarpoq taamatut akuersissummik pisimasut suli meeqqat angerlarsimaffiata ataani malinnaaffigineqartut taakkuukajunnerusartut ilinniagaqalerlutik naammassisut namminnerlu angerlarsimaffeqalertartut. 18-iliigaangamik anisariaqartartut taakkua annaasutut uanga taasinnaavakka, Rebekka Jørgensen oqarpoq.
- Nalliunnerat, ilinniarnerminni allagartartaarnerat, ullut taakku meeqqamut inuusuttuaqqamullu pingaartut peqataaffigalugit aamma taakkununnga pilluaammik tunisisarput inuunerannullu soorluli uppernarsaasutut aamma ilaasarpoq. Inuusuttup inooqataaneranut misigisitsisumik. Rebekka Jørgensen Uummannami Meeqqat angerlarsimaffianni perorsaasoq taama oqarpoq.
Uummannami meeqqat angerlarsimaffianni pisortap Ann Andreassenip oqaatigaa inuusuttut 18-iliinerisa kingorna 50-80 procentip tungaanoortut 18-niliinerisa kingorna paarineqarallarsinnaasartut.
