Inissiisarfimmiittut katsorsarneqartalerput

Pinerluuteqarsimasut inissiisarfimmeereeraangamik, ajornartorsiutitik nammineq aqussinnaalersimallugit inuiaqatigiinnut uternissamut periarfissaqarnerulissapput.

Tassami Pinerluuteqarsimasunut inissiisarfinniittut ajornartorsiutiminnik namminneq suliarinnilluarnerusinnaalersillugit katsorsarnissaannik, Pinerluttunik Isumaginnittut neqerooruteqartalersimapput.

Pinerluuteqarsimallutillu inissiisarfimmiittut katsorsartinnissamut neqeroorut atorluarpaat.
 
- Iluaqutaaqaaq, siornatigut inooriaaserisimasara mumippoq. Ullumikkut eqqissillunga inuusinnaavunga. Siornatigut inuuvunga imerajuttuullunga ikiaroorajuttuullungalu, ullumikkut qaatusimasuuvunga, pineqaatissinneqarsimasoq Hilmer Ipsen Kristensen oqarpoq.
 
Katsorsaasarnissaq pinerluuteqarsimasut inuiaqatigiinnut uteqqikkunik pinerloqqinnginnissaat anguniarlugu pilersinneqarpoq. Taamaalilluni pinerluuteqarsimasup pinerloqqinnginnissaa siunertaralugu.
 
- Inissiisarfimmiittut akisussaassuseqartumik ineriartortitsinissaat siunertaavoq. Imminut ataqqinermik, imminut tatigilernermik aammalu piginnaanermikkut kaammattorneqarlutik pinerluuteqanngitsumik inuunermik ingerlatsitseqqinnissaannik kaammattorneqarput, Inooqataanermut tunngasunik suliaqarnermut pisortaq Trine Chemnitz oqarpoq.
 
Kalaallit Nunaanni Pinerluttunik Isumaginnittut ukioq 2013-imut nalunaarusiaanni allassimavoq pinerluuteqarsimasut inissiisarfimmut inissinneqartut sakkortuunik ajornartorsiuteqartartut. Arlallillu inooriaasertik allanngortissimanagu inuiaqatigiinnut utertarlutik. Trine Chemnitz isumaqarpoq pineqaatissinneqarsimallutik inissiisarfimmiittut ikiorneqartarnissaat pingaaruteqartoq.
 
- Pisariaqarpoq. Isertitsivimmeereersimallutik inuunerminnik allannguisimanatik uteqqittut ilaatigut takusarpagut. Iliuusissatik nalullugit nutaatut eqqarsalersinneqarsimanatik anigaangamik pissutsit taakkua uteqqiattut uteqqiaffigisarpaat, Trine Chemnitz oqarpoq.
 
Katsorsanermi pinerluuteqarsimasup ajornartorsiutini sunaasoq paasissagaa siunertaavoq, aammalu ajornartorsiutip suliarinissaanut sakkussanik tunineqassasoq. Taamaaliornikkut pinerlussimasup naleqqutinngitsumik pissusilersornissaa pinngitsoortinniarneqarpoq. Katsorsaanermik suleriuseq "MUMIK"-mik atserneqarsimavoq. Pinerlussimasup mumisinneqarnissaa pinerloqqinnginnissaalu anguniarlugu.
 
Katsorsaasarneq ukioq kingulleq ukiakkut aallartinneqarpoq. Trine Chemnitzillu iluatsilluartutut nalilerpaa.
 
- Tigulluarneqartupilussuuvoq soqutigineqarlunilu. "MUMIK"-mut peqataasimasunit utertitsivigilluarneqarpugut. Nammineq oqaaseqarnerminni pissarsilluarsimallutik sakkussaminnik utertiffigivaatigut, Pinerluttunik Isumaginnittuni Inooqataanermut tunngasunik suliaqarnermut pisortaq Trine Chemnitz oqarpoq.
 
Inissiisarfinni sulisut pinerluuteqarsimasunik katsorsaasassapput. Kalaallit Nunaanni Pinerluttunik Isumaginnittut ilitsersuisartussanik 14-inik ilinniartitsisimapput.
Nuummi, Sisimiuni Ilulissanilu katsorsaasoqartarpoq.
 
Katsorsaaneq sapaatip-akunnerini arfineq-pingasuni sapaatip akunneranut marloriartarluni ingerlanneqartarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat