Inissiat pilerinartut Nuummi Tuapannguani sananeqassapput
Piginneqatigiilluni inissiani, Nuummi Tuapannguani sananeqartussani, atorfillit ineqalernissaanni immikkut pineqarnissaat, tunisinermilu inatsisip saneqqunnissaa, naalakkersuisut piareersimaffigeqqileraat, AG ullumi saqqummersoq allappoq.
Inissiarsuit Q, R S-illu ingitserneqariarlutik, taartissaannillu inissiarsuarnik arfineq-marlunnik sananissami, siullermeerluni aningaasaliissuteqarnissamik naalakkersuisut qinnuteqaataannik aningaasanut ataatsimiititap kinguartitsinerani tamanna takuneqarsinnaavoq.
Inissiat maannakkut attartortut ineqarfigissallugit akissaqartinngisaat isaasalerlugu ”naalakkersuisut namminneq sulisuinit”, ineqarfigineqassasut naalakkersuisut pilersaarutigaat.
Inissiat ilaat aatsaat ineqarfigineqanngippata inuit allat pisisinnaassasut, tamannalu immikkoortitsinerusoq, aviisi AG allappoq.
Tuapannguani pilersaarummi inissiarsuarnik ingitserineq sanaartornermilu aningaasartuutit allat 333 millioni koruuninik naleqassapput, inissiallu 210-ussallutik.
