Inissiat inuinnarnut neqeroorutigineqarnissaat piumasaraat
Inissiat innuttaasunut neqeroorutigineqarnissaat anguniarlugu atsiortitsinernik 1.350-inik katersuisitsisoqareersorlu Ineqarnermut Naalakkersuisoq Jens B. Frederiksen nalunaarpoq, inissiat 30-it piginneqatigiilluni inissiatut neqeroorutigineqassasut, annertuunik piumasaqaatitaqartunik.
- Tuapannguani inissiat attartugassanngorlugit neqeroorutigineqarpata taarsigassarsiniartarfimmut realkreditfondimut Namminersorlutik Oqartussat 100 millionit koruuninik atorniartariaqassapput, Jens B. Frederiksen oqarpoq.
Namminersorlutik Oqartussani sulisut utaqqiisaasumik inigitittagaannut ukiumut 18 millionit koruunit aningaasartuutigineqartarput, ilaatigut namminersortut inaataannik attartornermi ini ataaseq qaammammut 30.000 koruuninik akeqartarluni, tamakkulu pinngitsoorniarlugit Tuapannguani inissiat 90-it sulisunut inissiatut atorneqarnissaat aalajangiusimaneqarpoq.
Akerlissutsimik takutitsisut isumaqarput, inissianik 30-inik innuttaasut attartorsinnaanerannik periarfissiineq nipangarsaanerusoq. Inissiaatileqatigiiffiup INI A/S-ip inissiaataanni initaarniarlutik Nuummi utaqqisut 1.200-it sinneqarput, ilaalu angerlarsimaffeqanngillat, taamaakkaluartoq Namminersorlutik Oqartussat imminnut iluaqusersorlutik, sulisumik inissaannik sanaartortitsipput, isikkivigissuni aamma inissiassatut pilerigineqarluartuni.
Akerliussutsimik takutitsisut atsiortitsinermik katersinertik unitsippaat aamma naatsorsuutiginnngilaat akerliussutsimik takutitseqqissallutik, Sabina Eugenius akerliussutsimik takutitsisut atsiortitsinermillu katersuisitsisut ilaat oqarpoq.
