Inissiat Danmarkimiittut PCB-qarsinnaanissaat aarleqqutigineqarpoq
Inissiat betonimik sanaat peqqinnissamut aarlerinaateqarsinnaasunik PCB-nik akoqarsinnaasutut pasineqarput. Atuagassiami Ingeniørenimi taama allaaserinnittoqarpoq.
Allattoq Mads Lynge
PCB pissusissamisuunngitsumik hormoneqalersitsisinnaavoq, kræfteqalersitsisinnaallunilu, marraasersuinermilu atortakkami nassaassaalluni. Inissiat 1955-imiit 1976 tikillugu sananeqartut PCB-mik taassuminnga akoqarsinnaanissaat aarleqqutigineqarpoq, akuutissarlu taanna naterni qalipaatinilu atorneqarsimasinnaanissaa aamma aarleqqutigineqarpoq.
Inissiat 21.000-it, suliffeqarfiit illuliallu allat PCB-qarnissaat aarleqqutigineqarportaaq, piiarneqassappallu 3 milliardit koruuninillu aningaasartuutaasinnaalluni.