Inissiarsuarnik kusassaaneq INI A/Sip nangippaa

Meeqqat atuarfiini ukiaanerani pingasunngornermiit arfininngornermut atuanngiffeqarnermi Nuummi inuusuttut periarfissaqarput qalipakkanik sananissamut inissiarsuarni blok 1-imiit 10-mut nivinngarneqartussanik. Tamanna pissaaq "Den gamle auto"-mi Sanavejimiittumi piffissami nalunaaqutaq 13.00-miit 17.00-ip tungaanut.

- Narsarsuarmi inissiat ilaat kusassareerpagut kisianni suli arlallit amigaataapput. Taamaammat inuusuttut eqqumiitsuliorsinnaanerat atorlugu suliaq ingerlateqqinniarparput. Maanna inuusuttavut kisimik peqataassanngillat. Aammali bootcampimi peqataasimasut suleqataaniarput taakkulu suliaat takinerulaartumik oqaluttuassartaqarput. Suliat blok 4-miit 7-mut nivinngarneqassapput, INI A/S-mi attaveqarnermut pisortaq Else Løvstrøm oqarpoq. Ilanngullugulu oqaatigaa ilinniartitsisunngorniat sisamat INI A/S sinnerlugu suliami aqutsisuussasut.

Inuussutissarsiortut suliniut aamma taperserluarpaat. Suliffeqarfiit Stark aamma Flügger atortussanik tunniussaqarput. Aamma suliat siulliit nivinngaassorneqarnerattut Sanasoq Nuuk suliat tulliit nivinngaassorneqalerpata akeqanngitsumik ikiuunniarpoq.